Hjá teimum báðum flokkunum, sum hava sæti á fólkatingi, tykist ikki at vera tann stóri spenningurin. Høgni Hoydal er tryggur í oddasessinum í Tjóðveldinum, meðan Edmund Joensen helst fær ein innanhýsis skarpan gang frá løgmanni. Illa var, um løgmaður ikki megnar at geva einum av sínum undirsáttum ein skarpan gang – men tað skuldi bara kunna styrkt flokkin.
Skulu Fólkaflokkurin og Javnaðarflokkurin gera sær nakra vón um at endurvinna sessirnar frá favorittunum Tjóðveldi og Sambandsflokkinum, so skal okkurt heilt ótraditionelt gerast.
Listin, sum Javnaðarflokkurin kunngjørdi í morgun er ikki øðrvísi, enn væntandi var – burtursæð frá trumfinum Sjúrði Skaale. Spurningurin verður so, um hann megnar at gera tann vørrin, sum skal til, fyri at Javnaðarflokkurin skal sleppa undan at tapa tað fjórða fólkatingsvalið á rað. So illa hevur tað ongantíð gingið hjá Javnaðarflokkinum áður – flokkurin hevur ongantíð síðani heimastýrislógina tapt tvey fólkatingsval upp í slag.
Í Danmark eru tey troytt av eini stjórn, tá hon hevur sitið í áleið 10 ár. Soleiðis var við Anker Jørgensen í sjeytiáruønum, somuleiðis við Schlüther í áttatiárunum og Nyrup nítiárunum – og nú við Lars Løkke Rasmussen. Men soleiðis er uppbýtið ikki í Føroyum – Tjóðveldi og Sambandsflokkurin hava hildið hvørjum øðrum uppi nú í 13 ár. Í áttatiárunum vóru tað Fólkaflokkurin og Javnaðarflokkurin, sum polariseraðu hvønn annan, men tað ber ikki til at síggja sama mynstrið, sum í Danmark.
Nú valstríðið til fólkatingsvalið mennist, verður ikki so nógv tosað um løgtingsvalið. Tað er tó greitt, at valið verður í heyst, og røddir í politiska umhvørvinum vilja vera við, at løgtingsvalið verður skrivað út fyri fólkatingsvalið. Tað er Tjóðveldi, sum heldur løgmanni í sessinum. Hetta kann tera upp á grundarlagið hjá Tjóðveldinum – sum kann vísa sína styrki við at skrykka teppið undan løgmanni fyri fólkatingsvalið. Tá er polariseringin millum Tjóðveldi og Sambandsflokkin aftur har – og teir kunnu hvør í sínum lagi njóta gott av tí.
Um Javnaðarflokkurin við Sjúrði Skaale megnar at draga úr vinstra borði hjá Tjóðveldinum – meðan Poul Michelsen samstundis dregur úr høgra borði, so kann tað henda, at tað verður Høgni Hoydal sum dregur styttra stráið.
Jú, alt ber til í politikki.
