Tað var í juni mánaði í fjør, at Eysturkommuna og MT Højgaard skrivaðu undir sáttmála um nýggjan dagstovn við Gøtugjógv.
Tá ein kommuna veksur, sum Eysturkommuna ger, gevur hetta eisini avbjóðingar.
Verandi dagstovnur við Gøtugjógv er ov lítil, men í nýggja stovninum, sum verður 1.296 fermetrar stórur, verður pláss fyri ávikavist 60 barnagarðsbørnum og 52 vøggustovubørnum - ella 112 børnum tilsamans.
Tað er arkitekturin, Ósbjørn Jacobsen, sum hevur teknað stovnin.
Lendisviðurskiftini, har nýggi stovnurin verður bygdur við Gøtugjógv, eru avbjóðandi, men hesi hevur arkitekturin sæð sum ein viðleikara heldur enn ein mótleikara.
Avbjóðingin hjá arkitektinum hevur verið at skapt eina náttúrliga eind, sum tekur støðið í staðnum og lendisviðurskiftunum.
Per Martin Gregersen, borgarstjóri í Eysturkommunu, sigur, at nógvir fyrispurningar eru um, hvat kommunan ætlar sær at gera við verandi stovn, tá nýggi stovnurin stendur liðugur.
- Her hava nógv ymisk hugskot verið - alt frá at brúka stovnin til musikkskúla, kvøldskúla, eyka skúlastovur - til at onkur hevur bjóðað sær at keypt bygningin.
Borgarstjórin vísir á, at enn hava tey í Eysturkommunu ikki tikið støðu til, hvussu verður við verandi stovni.
Soleiðis, sum fólkatalið í kommununi er vaksið seinnu árini, eru eisini árgangirnir av børnum vorðnir størri, soleiðis at hvør árgangur nú er farin úr 30 og upp í 40 børn.
Per Martin Gregersen sigur, at tað verður fantastiskt at fáa nýggja stovnin við Gøtugjógv.
- Í barnaskúlanum í Leirvík ganga tey smáu børnini í kommununi upp til og við 3. flokk, og síðan ganga 4., 5., 6. og 7. flokkur við Gøtugjógv. Skúlaspírin, sum er forskúlin fyri børn beint undir skúlaaldur, er eisini í Leirvík, leggur borgarstjórin aftrat.
