Vinnurekandi, sum hava roknskaparskyldu mótvegis Taks, skulu um stutta tíð seta skattaroknskapin upp eftir nýggjum leisti.
Taks hevur í nøkur ár arbeitt við at menn sonevnda eroknskapin, har endamálið er, at allir roknskapir til myndugleikarnir verða standardiseraðir og talgildir.
Fyri inntøkuárið 2015 er krav, at skattaroknskapurin verður settur upp eftir ávísum standard roknskaparleisti. Tað vil siga, at roknskapirnir fyri 2014 ikki eru fevndir av kravinum, men kortini hevur Taks lagt nýggju vegleiðirnar tøkar, so fyritøkur, einstaklingar og onnur longu nú kunnu seta roknskapirnar upp eftir nýggja leistinum.
Á heimasíðu sínari skrivar Taks, at talan er um sjey ymiskar leistir av standardroknskapum, harav fýra eru roknaðir til einstaklingavirki og tríggir til feløg og felagsskapir. Flestu einstaklingavirkini skulu nýta ein og sama leist, men bóndir, hýruvognsánarar og útleigarar skulu nýta hvør sín serstaka leist
