Á bygdaráðsfundi í Hvalbiar kommunu mánadagin í vikuni samtykti bygdaráðið einmælt at fara undir at gera vegastrekkið í Garðsenni av nýggjum.
Talan er um vegin frá Roynhøllini og vestur um vegamótið til Nýggjaveg.
Í Hvalbiar kommunu hava tey í eina tíð arbeitt við at fyrireika eina dagføring av vegastrekkinum, og tað er Landsbyggifelagið, sum hevur staðið fyri útbjóðingartilfarinum í samstarvið við vega- og havnanevndina hjá kommununi.
Týsdagin í vikuni varð arbeiðstøkusáttmáli undirskrivaður á kommunuskrivstovuni í Hvalba, og hesi sáttmáli er millum Hvalbiar kommunu og E–Grevstur, sum skal gera arbeiði.
- Ætlanin er, at arbeiðið skal byrja innan einar 14 dagar, og arbeiðið kemur at viðføra nakað av órógvi í ferðsluni, meðan hetta er í gongd. Tískil verður heitt á bilførarar og borgarar annars um at vísa varsemi.
Í Hvalbiar kommunu fegnast tey um, at vegurin nú verður dagførdur, og roknað verður við, at arbeiðið fer at vara í nakrar vikur.
##med2##
