ÓLAVUR Í BEITI
Norski frystilínubáturin »Urvåg« var í vikuskiftinum landaður á Havnini, tí Vaktar- og Bjargingartænastan hevur mett at hjáveiðiprosentið er yvir tað loyvda. Vaktarskipið »Gorm« var á Havnini við »Urvåg« leygarmorgunin og farið var beinanvegin undir at landa frystilínubátin.
Klokkan 18.00 sunnukvøldið, tá ið Internetsosialurin hevði Djóna Weihe frá Vaktar- og Bjargingartænastuni í telefonini, vóru teir ikki lidnir at landa »Urvåg«, men Djóni Weihe metti tá, at tað fór helst at verða seint sunnukvøldið. Og nú fyriliggja so tølini frá landingini og vísa tey, at hjáveiðiprosentið hjá »Urvåg« lá beint oman fyri 45 prosent, neyvt 45,04%.
Ov nógv í lastini
Tað gamla hjáveiðiprosentið var 35 prosent, men eftir nýggju fiskiveiðiavtaluni millum Føroyar og Noregi er hjáveiðuprosentið sett niður á 30 prosent. Hetta er ikki lýst enn, men verður lýst í Kunngerðarblaðnum í hesi vikuni. Orsøkin til, at tað ikki er lýst enn er ikki frá umsitingini, men tí blaðið seinast var beint farið til prentingar, verður sagt frá Fiskimálastýrinum.
Herfyri var eisini annað norsk skip tikið, og tá var roynt at vísa til gamla hjáveiðiprosentið uppá 35 prosent, men tað vinnur helst ikki frama, tí í avtaluni millum Føroyar og Noregi er eingin ivi at hjáveiðiprosentið er 30 prosent, tó at tað ikki er lýst enn í Kunngerðarblaðnum.
178 tons inni
»Urvåg« hevði 178 tons tilsamans, men sambært botnfiskakvotuni hjá norskum skipum undir Føroyum, sum umfatar longu, blálongu, brosmu og upsa, vístu tølini fyri onnur fiskasløg rættiliga nógv oman fyri loyvda hjáveiðiprosent, og er málið nú latið fútanum at taka støðu til, verður sagt frá Vaktar- og Bjargingartænastuni.
