Tað var umborð á skipinum Oybard, at ein av manningini datt niður í lastina og fekk stóran skaða. Tyrlan var stødd í Koltri, tá MRCC-støðin sendi boð eftir henni. Farið varð úr Koltri vestur í Vágar eftir bjargingarmanning. Umleið klokkan fimm var tyrlan hjá norska skipinum Oybard einar 58 fjórðingar í ein landnyrðing úr Føroyum.
Bjargingarmaður varð loraður niður á skipið og fekk sjúklingin á børu, áðrenn hann var hivaður upp í tyrluna. Klokkan var 18.19, tá tyrlan lendi á pallinum við Landssjúkrahúsið í Havn.
Fríggjadagin var bjargingartyrlan úti í Tindhólmi eftir einum manni, sum hevði meitt sær beinið. Hann varð fluttur á Landssjúkrahúsið.
