Bíðilistin hjá børnum og ungum at sleppa í viðgerð hjá sálarfrøðingini, er minkað munandi hesi bæði seinastu árini. Tað staðfestir Heilsumálaráðið í morgun.
Tá bíðilistin var longst í 2012, bíðaðu 161 børn eftir at verða útgreinað. Tann 1. januar í 2013 stóðu 135 børn og ung á bíðilista og í november 2013 stóðu 70 á bíðilista og nú er hann komin niður í 40 børn og ung, vísir ein uppgerð hjá psykiatriska deplinum.
Stytta bíðirøðin merkir, at bíðitíðin til psykiatriska hjálp nú í mesta lagi eru góðar fýra mánaðir, sigur Heilsumálaráðið.
- Talið á børnum á bíðilistanum hevur støðugt verið lækkandi síðani 2012, tá íð 1,5 milliónir krónur vórðu settar til Landssjúkrahúsið um árið, og tær vórðu markaðar til at fáa bíðirøðirnar burtur.
- Tá bíðitíðin hjá børnum og ungum at sleppa til sálarfrøðing, var longst, var hon upp ímóti hálvum triðja ári, men tey, sum høvdu álvarsligan, ella bráðfeingis tørv, sluppu sjálvsagt fyrr framat.
- At fáa bíðitíðina til psykiatriska hjálp niður, hevur verið eitt hjartamál hjá mær sum landsstýrismaður og hjá samgonguni, sigur Karsten Hansen, landsstýrismaður, í fráboðan í morgun.
Psykiatriski depilin á Landssjúkrahúsinum vísir á, at hvørt ár verða fleiri enn 70 børn og ung víst til sálarfrøðing.
|
