Kviki vongspælarin hjá VÍF-kvinnunum seinnu árini, Nicolina Eyðbjørnsdóttir, hevur sum fyrsti føroyski hondbóltsspælarin nakrantíð fingið sáttmála við eitt spanskt felag.
Ein gamal dreymur
Nicolina sigur, at tað er ein gamal dreymur hjá henni, sum nú verður veruleiki. Liðið, sum hon skal spæla við, eitur Bazetizuazo og spælir í næstbestu sponsku deildini. Í farna kappingarári gjørdist liðið nummar fýra, og málið hjá felagnum er avgjørt, at tær skulu rykkja upp í bestu deildini komandi ár, sigur Nicolina Eyðbjørnsdóttir.
Tað er Daniel Rapa, ið hevur fingið avtaluna hjá Nicolinu í lag. Hann kendi onkran rumenskan spælara í felagnum, og á henda hátt fekk hann samband við felagið. Nøkur videobond av dystum hjá VÍF-kvinnunum vóru send til Spania, og nú er sáttmálin so fingin í lag.
Spanska felagið hevur heimstað einar átta kilometrar uttan fyri kenda býin Bilbao í norður Spania, og Nicolina greiðir frá, at hon fer fyri fyrst bara at spæla hondbólt og so kanska at ganga á málskúla, so at hon kann læra seg málið sum skjótast. Sáttmálin millum Nicolinu Eyðbjørnsdóttir og Bazetizuazo er galdandi í eitt ár, og vestmannakvinnan skal byrja í Spania síðst í august mánaða.
