FØÐINGARDAGUR
Eitt klípi í siðsøguliga varðan. Hesi orð tekur Nicolina Jensen Beder sjálv til um filmin um føroyska siðvenju innan ull og ullarvirking, sum hon hevur verið við til at gjørt. Fyri Føroya Heimavirkisfelag, sum hátíðarhelt 15 ára stovningardagin og útgávuna av filminum sunnudagin, var hetta ein stórur dagur.
Mánadagin 28. mai vóru fimtan ár síðani Føroya Heimavirkisfelag varð stovnað. Dagurin varð hildin sunnudagin í Búnaðardeplinum í Kollafirði við framsýning, heiðring og filmútgávu. Størsta løtan undir hátíðarhaldinum var uttan iva, tá ið Nicolina Jensen Beder varð heiðrað og tilnevnd heiðurslimur.
- Nicolina Jensen Beder hevur verið við til at leggja lunnar undir føroyskt heimavirki í breiðastu merking. Við sínum holla kunnleika um føroyska siðvenju innan ullararbeiði og annars sum lærari innan alskyns handarbeiði hevur hon lært frá sær og vakt áhuga hjá fólki at virka dygdarlutir, segði Nigro Hermansen, formaður í Føroya Heimavirkisfelag, undir tilnevningini.
Høvuðsendamálið við filminum, sum eisini er ætlaður til skúlabrúks, er at lýsa arbeiðsgongdina í ullararbeiði. Nicolina Jensen Beder hevur skrivað handritið og hevur leiklutin í filminum. Farið varð í holt við filmin í 1999, og Árni Conradsson og Zakaris Hammer hava framleitt filmin. Tónleikin hevur Martin Joensen gjørt og Ívar Iversen lesur.
Framsýning
Føroya Húsarhaldskúli, sum heldur til í Klaksvík, skipaði undir hátíðarhaldinum fyri eini framsýning av lutum, ið eru virkaðir á skúlanum, og leiðarin á skúlanum, Jóhanna á Tjaldrafløtti greiddi frá virkseminum á skúlanum. Anna Lousia Joensen greiddi frá einum víkingamarknaði, sum verður í Havn um ólavsøkuleitið. Sjálv hevur hon virkað klæði, ið eru í tráð við tey, sum vórðu brúkt í víkingatíð, og hesi sýndi hon fram sunnudagin. Umleið hálvt hundrað gestir úr 12 londum eru bodnir at taka lut. Eisini fólkasløg, ið høvdu samband við víkingarnar fyri 1000 árum síðani vera við á leguni. Har ímillum handverkarar av ymiskum slagi. Endamálið við tiltakinum er at varðveita gomul handverk og vitan á ein livandi hátt.
Heimavirking í Føroyum er gomul siðvenja, men áðrenn Føroya Heimavirkisfelag varð sett á stovn í 1986 var einki felag av slíkum slag í Føroyum. Lokal feløg vóru og eru kring landið, men grundin til at eitt umfatandi heimavirkisfelag var stovnað var, at koma upp í norðurlendskt samstarv.
- Norðurlendska samstarvið gevur okkum nógv. Vit síggja eitt nú, hvat nýtt hendir á økinum, sigur Nigro Hermansen.
Føroya Heimavirkisfelag er felag fyri øll, og formaðurin í felagnum stúrir ikki fyri, at tíðin fer frá einum felag sum hesum, ið hevur til endamáls at stuðla heimavirkisáhugaðum.
- Vit eru um 300 limir og limatalið veksur støðugt. Eisini yngri fólk gerast limir. At varðveita gamlar heimavirkissiðir er umráðandi og tað gera vit við eitt nú útgávuni av filminum og við tiltøkunum, sum vit skipa fyri.
Her sipar hann til smiðjuna í gomlu Hoyvíkini, sum er endurreist. Har er ætlanin at læra fólk upp at smíðja. Somuleiðis eru tiltøkini Hendur & Hugflog og jólasølan í Badmintonhøllini afturvendandi tiltøk á hvørjum ári, og bæði tiltøkini eru væl vitjað.
