Á jólahugnaði hjá Skálafjarðar Sløkkiliði leygarkvøldið hin 21. desember takkaði formaðurin í tilbúgvingarnevndini, Jóhannus Danielsen, borgarstjóri í Nes kommunu, Niclasi og Hanusi fyri teirra trúfesti móti hesum felagsskapi hjá kommununum við Skálafjørðin.
Jóhannus Danielsen bar eisini fram eina tøkk frá tilbúgvingarnevndini og kommununum til alt sløkkiliðið, sum ger at fantastiskt arbeiði, ið mangan ikki er vandaleyst.
Formaðurin í tilbúgvingarnevndini hevði eina greiða fatan av, at borgararnir eru sera takksamir fyri tað arbeiði, sum lagt verður úr hondum. Ikki minst, tá óhapp og ódnarveður raka bæði virkir og húskir og brádliga broyta dagligu umstøðurnar.
Hann vísti eisini á, at tað veruliga kann sigast, at manningin hjá Skálafjarðar Sløkkiliði er ein trúfastur skarði.
- Ikki færri enn 13 mans hava verið fleiri enn 25 ár í sløkkiliðnum, og harav átta, sum hava verið heilt frá, at sløkkiliðið varð stovnað i 1974 og hava soleiðis heili 39 ár á baki í sløkkiliðnum.
Teir, ið eru á myndini, sum Hjalmar Juul tók, eru Jóhannus Danielsen, Hanus Heinesen, Niclas Davidsen og Sunleif Højgaard, tilbúgvingarleiðari.
