Fyri umleið fimmogfjøruti árum síðani gjørdi Palli Gregoriussen, arkitektur, vart við, hvussu ljót, skilaleys og klossut í náttúruni starvsfólkahúsini vóru, sum ætlanin tá var at byggja til Landssjúkrahúsið.
Hansara skilagóða mótmæli varð ikki tikið til eftirtektar. Palle Gregoriussen hevur mangan verið heppin ráðgevari til skilagóða húsabygging, eitt nú hjá peningastovnum.
Við átøkum og frálíkum tekningum hevur Palle upplýst okkum um fornan føroyskan byggisið og arkitektonisk kirkjuvirði. Eisini skilagott.
Men at okkara góði og háttvirdi arkitektur Palli Gregoriussen leggur navn til nú fráboðaðu neyðtøku av okkara lítla, gamla býi - í so at siga sjálvari sálini í Tinganes-Kongabrúnni-Bumshamri – kemur óvæntað á mangan føroying og ikki minst á rótfest havnarfólk!
Hesin ørskapur er í roynd og veru framhald av skilaloysinum og vandalismuni, sum fór fram í Gongini í 1932, tá tær smáu stovurnar: Villumsstova, Ásbistova, í Gong, Selatraðsstova, Dávastova, við Stein og Ísaksstova vórðu rivnar niður, og ein betonblokkur kom í teirra stað.
At løgtingsmenn og býráðslimir í Havn klappa fyri ørskapinum, er ræðandi.
