Tríggir dreingir standa og kjakast um, at tveir teirra júst hava sæð huldufólk. Hin triði trýr ikki uppá tílíkt. Tá koma nakrar álvagentur í kjóla dansandi til teirra. Tær dansa og forføra. Dreingirnir verða meir og meir býttir uppií teimum. Inntil nakrar gentur brádliga koma rennandi og skúgva álvagenturnar til viks, so tær ikki skulu fanga dreingirnar.
Hetta brot er tikið úr leikinum Menniskja og tey fornesku ið Dramaverkstaðið hjá Hjørdis Johansen framførdi.
Her kemur ein flokkur av ungdómum út á eitt stað, har tey møta ymiskum verum úr teimum gomlu føroysku sagnunum.
Leikurin var fyrsta framførsla á NEATA festivalinum, sum er størsta sjónleikatiltak sum hevur verið í Føroyum.
Um 120 áhugasjónleikarar úr Norðurevropa luttaka á festivalinum, sum varðar í eina viku. Sjónleikararnir eru úr Føroyum, Íslandi, Noregi, Svøríki, Danmark, Hetlandi, Estlandi, Lettlandi og Litava.Festivalurin varð settur í Norðurlandahúsinum í gjárkvøldið av Jógvani á Lakjuni, mentamálaráðharra. Hann vónar at allir luttakararnir fara at fáa nakað burturúr festivalinum og fáa íblástur frá hvør øðrum, hóast luttakaralondini eru sera ymisk.
