Virðingin fyri suðringum og vinnuni í oynni frá landsmyndugleikans síðu er eftir seinastu støðutakan teirra á einum sera lágum støði! - teir halda, at vit skulu taka til takkar við tí, sum okkum verður bjóðað óansæð trygd og dygd.
Einhvør sum hevur eitt sindur av skili kann siga sær sjálvum, hvat tað hevur at týða fyri vinnuna, um hon ikki fær flutt sín farm avstað úr oynni, tá hon skal - og skal tað verða soleiðis í heyst og vetur, og kanska út á várið, at skiparin á Smyrli skal hava tað tungu byrðu á sær at avgera, nær møguligt er at flyta farm vegna veður fyri trygdina - tá skulu væntast nógvar avlýsingar vegna trygdina umborð, sum sjálvandi skal setast í hásæti.
Vinnan kemur her at verða fyri einum enn størri bakkasti, enn tá verkfallið rakti somu vinnu so dyggiliga í summar.
Spyrjið tit skipararnar á Smyrli um, hvussu fer at gangast um tit ætla at sigla uttan stabilisatorar í heyst og vetur?
Reiðarin á Strandferðsluni hevur sagt, hvussu fer at verða um ikki annað skip fæst at sigla. Reidar Nónfjall bant um heilan fingur sum rætt var, men hvat fekk hann afturfyri sína professionellu støðutakan?
Krakk frá landsstýrinum og vinnumálaráðharranum sum feigaðu hansara uppskot til loysn av trupulleikanum av borðinum!
Og tað sama fáa Suðringar - enn einaferð!
Um ikki avvarðandi myndugleikar finna eina sømuliga loysn á hesum fyri allar suðringar og vinnuna í oynni so álvarsligu støðu, sum siglingin og flutningur til og úr oynni fer at koma í, í nærmastu framtíð, so fara vit at kalla saman til oyggjafund, har støða verður tikin til, hvat gerast skal í verki fyri at verða hoyrd og vird av landsins myndugleikum!
Vit krevja sama rætt og somu møguleikar sum restin av landinum hvat viðvíkur flutningi av fólki og farmi til og frá meginøkinum.
