Vit vóru nøkur sum um aldarskiftið vístu á, at tað vóru fleiri lond her vestanfyri, sum høvdu eina klippukortsskipan innan ferðsluøkið, m. a. Ísland. Víst var á tann góða moralin við einari klippukortsskipan har akfarsførarar í einum 3-ára tíðarskeiði hava møguleikan at bøta upp á skeivar gerðir í ferðsluni. Ein kann blíva nullstillaður í klippikortsskipanini/stigaskipanini eftir trimum árum, um ein skikkar sær væl í ferðsluni í hesum 3-ára skeiðnum! Men m. a. nógvir tingmenn sóu seg illar inn á hesa »poengskipan« og hesi »bonusklippini«, sum onkur núverandi floksformaður málbar seg á sinni. Tað kom eisini undan kavi, at Danmark ikki hevði hesa klippikortsskipanina, og tí var sjálvsagt, at vit í Føroyum ikki áttu at hava hana heldur. Tað var einasta poengið teir høvdu!
Men danir gera tað, sum vit føroyingar ikki gera! Teir hyggja nevnliga eftir, hvussu gjørt verður í øðrum londum enn bara í Danmark. Og danir hava m. a. hugt eftir, hvussu teir gera í Íslandi! Og nú hava danir sjálvir innført eina klippikortsskipan, sum eru ógvuliga lík tí íslendsku. Og sum formaðurin í »Rådet For Større Færdselssikkerhed« segði við eitt føroyskt tíðindablað í síðstu viku: »Med stor succés«. Og nú tá danir hava hesa klippikortsskipan skuldi væl verið møguleiki fyri, at vit fáa eina líknandi skipan lógarfesta í Føroyum. Annars er Danmark undangonguland tá tað kemur til súkklubreytir. Danmark er óiva besta súkkluland í heiminum. Haraftrat hava danir gott útsýni við nærum allar krossvegir. Har hava føroyingar ikki fylgt dønum serliga langt, fyri ikki at siga: als ikki! Men lat tað vera eina góða byrjan at innføra klippikortsskipanina. Sofus Hansen, fólksins maður í ferðslumálum vísti so staðiliga á í Sjónvarpstjakinum, at tað snýr seg fyrst um upplæring og motivasjón, og ikki um straff! Og rætt hevur hann!
heri.simonsen@postur.fo
