Ungir føroyingar í dag vísa nógv størri áhuga fyri íverksetan í mun til fyri fáum árum síðani.
Tað leggja tey merki til í Hugskotinum, sum húsast í Sjóvinnuhúsinum á Vestaru Bryggju í Havn, har fleiri føroyskir íverksetarar arbeiða við sínum hugskotum og verkætlanum.
– Íverksetaramentanin í Føroyum er nógv broytt seinastu árini. Tey ungu eru blivin meira tilvitað um, at tað er ein møguleiki at blíva íverksetari, og tað er onkursvegna blivið meira legitimt at seta egna fyritøku á stovn, sigur Sóley Heradóttir Hammer, leiðari í Hugskotinum, og vísir á møguligar orsøkir til hetta.
– Tíðirnar eru góðar í Føroyum í løtuni, og tað er heilt vist ein av orsøkunum til at hesa gongdina. Ein onnur orsøk kann eisini vera, at føroyingar hava fingið nakrar fyrimyndir í íverksetan sum til dømis Heina Zachariassen frá Vivino, sum hevur víst, hvussu langt mann kann koma við einum góðum hugskoti. Tað ger, at nýggju íverksetararnir fáa blóð upp á tonnina, sigur hon.
##med2##
– Vit síggja eitt stórt potentiali
Hugskotið leggur dent á at møta teimum ungu, har tey eru. Tí var Hugskotið fyrst í februar við til at skipa fyri tveimum tiltøkum í Århus og Odense, har umboð fyri Hugskotið fortaldu føroysku útisetunum um vaksandi hugin og dirvið hjá føroyingum at royna seg sum íverksetarar.
Í hesum sambandi gjørdi Hugskotið eina spurnarkanning millum tey lesandi. Spurningurin ljóðaði: “Umhugsar tú at skapa títt egna starv, tá tú flytir til Føroya?".
– Spurnarkanningin vísti, at 40 prosent svaraðu ja, meðan 10 prosent ikki vistu. Tað vil siga, at áleið helvtin umhugsar at stovna sína egnu fyritøku. Tað halda vit er sera áhugavert, og vit síggja eitt stórt potentiali í hesum, sigur Sóley Heradóttir Hammer.
Íverksetaradíkjari
Í Hugskotinum eru tey byrjað at skipa fyri tí, sum tey kalla fyri íverksetaradíkjari. Talan er um eitt intensivt skeið á seks vikur fyri íverksetarar og smærri fyritøkur, sum møta hvørja viku til verkstovur og ráðgeving frá mentorum úr føroyska vinnulívinum umframt øðrum serfrøðingum. Skeiðið endar við einum tiltaki 6. mars, har tey luttakandi fara at leggja fram á Vinnuforum fyri møguligum íleggjarum og samstarvsfeløgum.
Aktuella verkætlanin í løtuni eitur "Nýskapan í ferðavinnuni", og átta fyritøkur luttaka í hesum íverksetaradíkjaranum.
– Endamálið er at eggja íverksetum til nýhugsan á ferðavinnuøkinum, at stuðla nýggjum fyritøkum, ið arbeiða við ferðavinnu, og at spjaða ferðavinnuna bæði landafrøðiliga og yvir árið, siga tey úr Hugskotinum.
Nógvir møguleikar í ferðavinnuni
Nettupp ferðavinnan er eitt av teimum økjunum, sum Hugskotið sær nógvar møguleikar í hjá spírandi íverksetum at royna seg í.
– Beint nú síggja vit, at ferðavinnan sær øgiliga spennandi út, og vit hava nógvar verkætlanir innan fyri hetta, sigur Sóley Heradóttir Hammer og greiðir víðari frá, hví so nógvir møguleikar eru í júst ferðavinnuni.
– Tað er rættiliga lætt at byrja í ferðavinnuni, tí mann kann byrja uttan at gera tær stóru íløgurnar. Vit fáa alsamt fleiri ferðafólk, og har er ein marknaður. So tað snýr seg bara um at gera produktini til tey fólkini, og hesi produktini eru nokkso løtt at gera, tí ferðafólk vilja eitt nú síggja náttúruna, sigur hon.
##med3##
Skapandi vinnan hevur eisini undanvind
Filmshúsið og Klippfisk halda eisini til í Sjóvinnuhúsinum, og hetta er við til at skapa eitt ávíst filmsumhvørvi. Tí síggja tey í Hugskotinum eisini filmsvinnuna sum ein áhugaverdan møguleika hjá íverksetum fyri tíðina.
– Vit hava nakrar verkætlanir her í húsinum, sum venda sær til filmsvinnuna. Tað skulu nógvir ymiskir førleikar til fyri at gera film, og tí loftar filmsvinnan nógvum ymiskum fólkum, sum hava ymsar bakgrundir. Fyrr sá mann tað sum hobbyvirksemi at fáast við film og annað skapandi, men tey ungu í dag hava fingið nógv størri møguleika at arbeiða í kreativu vinnuni, sigur Sóley Heradóttir Hammer.
Ein annar tendensur millum føroysku íverksetararnar er eitt størri dirvi.
– Vit síggja, at fleiri tora at taka kappingina upp við tað almenna við eitt nú at fokusera upp á betri kundarøkt á ymsum økjum, sigur leiðarin.
– Øll vilja hvørjum øðrum tað besta her
Tá mann blívur partur av Hugskotinum, verður mann partur av einum netverki, har mann deilir vitan og netverk í inspirerandi umhvørvi.
– Við at flyta inn í Hugskotið fær mann lætta atgongd til vinnulívið, og tað er lætt at skapa sær eitt netverk, vísir Sóley Heradóttir Hammer á.
##med4##
– Yvirhøvur er hugburðurin hjá íverksetunum í Hugskotinum sera positivur. Øll, sum eru her, eru á einum máli um, at tað er ein serstakur stemningur í Hugskotinum. Tað kemur av tí, at hetta er eitt arbeiðspláss, har eingin refererar til hvønn annan sum starvsfelagar ella kappingarneytar. Heldur er tað soleiðis, at øll vilja hvørjum øðrum tað besta og royna at hjálpa hvørjum øðrum, sigur Sóley Heradóttir Hammer.
