Í dag gevur Posta út nýggj frímerki, sum mynda ávikavist føroyska árabátin, smálomb og sjógæti.
Hin føroyski árabáturin hevur helst sín uppruna í smábátum hjá landnámsmonnunum. Føroyski árabáturin er sagdur at vera tað ítasta, hitt føroyska handverkið hevur skapað, og hevur hann sítt pláss millum teir vakrastu og mest fullkomnu bátar í heiminum.
- Frímerkjaarkið við níggju frímerkjunum vísir sjálvan árabátin umframt lutir, sum verða brúktir umborð. Edward Fuglø hevur teknað.
Posta vísir á, at seinast í apríl vísir mætasta og mest virðismetta várteknið seg.
- Øll - stór sum smá - gleða seg til hendingina. Vit kveita langtandi niðan í bøin, serliga har vit vita, at tey fyrstu smálombini plaga at koma. Og so brádliga stendur tað har ársins fyrsta smálamb. Myndina hevur Marita Gulklett tikið.
Tað er ein sannroynd, sigur Posta, at allur fiskur og skeljamatur úr Norðurhøvum er sera vælsmakkandi og heilsugóður.
- Okkara streymviðurskifti, hitalag og gróður í okkara maritimu floru og faunu, geva optimalar vakstrarumstøður. Altjóða rákið innan gastronomi, har størri og størri dentur verður lagdur á uppruna føðivørur, ger seg nú eisini galdandi á okkara leiðum.
Posta sigur, at tey fýra frímerkini, sum ímynda sjógæti, vísa taskukrabba, tannkrabba, rækju og hummara. Astrid Andreasen hevur teknað.
