Hesi seinastu árini er kynsbýtið í almennum ráðum og nevndum, batnað eitt sindur. Tað staðfestur Javnstøðunevndin í ársfrágreiðing síni.
Í 2000 vóru 70 prosent av sessunum í almennum nevndum og ráðum, mannað við monnum, men í fjør var talið komið niður á 61 prosent, Sostatt er kynsbýtið batnað níggju prosentstig hesi seinastu 17 árini.
Men tað er serliga eitt aðalráð í landsstýrinum, sum dumpar í javnstøðu, og tað er Fiskimálaráðið, tí tað eru heili 74 prosent av sessunum í nevndum og ráðum undir Fiskimálaráðnum, sum eru mannað við monnum. Men tó er ein munandi bati hendir seinastu árini, tí í 2000 vóru heili 93 prosent av sessunum mannað við monnum.
Í Fíggjarmálaráðnum er eitt sindur frægari - men bara eitt sindur, tí har hava menninir 67 prosent av nevndarsessunum. Men eisini tað er ein bati, tí í 2000 sótu menninir á 75 prosentum av sessunum í nevndum og ráðum undir Fíggjarmálaráðnum.
Í hinum aðalráðunum sita menninir á ímillum 59 prosent og 65 prosent av nevndarsessunum. Einasta undantakið er Almannamálaráðið tí har eru fleiri kvinnur enn tað eru menn í nevndarsessunum við tað, at kvinnur sita í 56 prosentum at nevndarsessunum.
Men Javnstøðunevndin sigur, at av teimum átta aðalráðunum er tað bara hjá Løgmansskrivstovuni, at bæði kynini eru umboðað í øllum nevndum og ráðum.
Av teimum 149 nevndunum og ráðunum, sum eru hjá tí almenna tilsamans, eru tað 51 nevndum og ráðum, ella í einum triðingi, har kynsbýtið er at kalla javnt.
Men í 18 nevndum og ráðum, ella í 12 prosentum, eru bara menn, men tað er bara ein einasta nevnd, har bara kvinnur sita.
Eftir javnstøðulógini skal kynsbýtið í almennum nevndum, ráðum verða javnt. Men eru serligar grundir fyri at javnvág ikki er ímillum kynini, skal almenna fyrisitingin søkja Javnstøðunevndina um undantaksloyvi, fyri at víkja javnstøðu.
– Hetta verður tó sjáldan gjørt, sigur Javnstøðunevndin.
