Tað verður stórur dagur í Klaksvík í morgin, tá nýggja uppsjóvarskipið Christian í Grótinum kemur.
Skipið, sum er 90 metrar langt og út við 18 metrar breitt, er bygt á Karstensens Skibsværft A/S í Skagen.
Seinnapartin sunnudagin fór Christian í Grótinum úr Skagen, og klokkan 16 í morgin verður móttøka á bryggjuni í Klaksvík.
Tað var Tina Rasmussen, kona skiparan, sum gav skipinum navn, og í hesum sambandi var hátíðarløta í Skagen.
Skipari á veg heim við nýggjasta skipinum í føroyska fiskiskipaflotanum er Bogi Rasmussen, sum eisini er ein av eigarunum.
Sum skilst, arga veðurvánirnar fyri morgindagin, og nú er endalig avgerð tikin um, at móttøkan verður klokkan 16 - og ikki klokkan 14.
Jón Rasmussen, sum er skipari á Norðborg, sigur við In.fo, at øll eru hjartaliga vælkomin umborð á nýggja skipið, og her verða ongar avmarkingar.
##med2##
