Fimm dagar eftir skottilburðin í Örebro, sum kostaði 11 fólkum lívið, hevur svenska løgreglan framvegis ikki eydnast at finna eitt greitt motiv.
Løgreglan hevur eina góða mynd av rørslunum hjá gerningsmanninum týsdagin, sigur Henrik Dahlström frá løgregluni í Örebro á tíðindafundi tíðliga í kvøld.
Men motivið fyri hópskjótingini er enn ókent.
- Vit hava ikki megnað at funnið eitt greitt motiv, sigur Dahlström, sum er yvirmaður hjá løgregluni.
Hann lovar, at løgreglan fer at halda fram ótarnað.
- Vit fara at arbeiða við fullari ferð við at greiða motivið. Vit fara ikki at geva upp, sigur hann.
Skjótingin í Örebro hevur verið kallað tann ringasta í svenskari søgu.
Vápnaður við fleiri byrsum skeyt og drap tann, sum er undir illgruna fyri at vera gerningsmaðurin, 10 fólk í Rigsbergska skúlanum. Hann skeyt eisini eftir løgregluni, sum seinni fann hann deyðan inni í skúlanum, upplýsir løgreglan.
Tríggjar riflur og stór nøgd av skotvápnum vórðu funnin við líkið.
Fleiri svenskir miðlar hava skrivað, at gerningsmaðurin var úti eftir ávísum fólkum. Hetta hevur løgreglan ikki váttað.
Á tíðindafundinum verður Henrik Dahlström spurdur, hvussu nógv skot gerningsmaðurin skeyt. Løgreglan veit talið, sigur hann. Men fyri kanningina verða upplýsingarnar ikki deildar við almenningin.
Fyrr í vikuni deildi løgreglan fleiri upplýsingar um tey dripnu.
Sjey kvinnur og fýra menn - harímillum tann 35 ára gamli, sum er undir illgruna fyri at vera gerningsmaðurin - lótu lív.
Yngsta offrið var ein 28 ára gamal maður, meðan elsta offrið var ein 68 ára gomul kvinna.
Løgreglan hevur tó ikki upplýst, hvørjum tjóðskapi ofrini eru. Løgreglan hevur staðfest, at tað eru fleiri tjóðskapir millum tey dripnu, men greitt er ikki hvørjir.
Svenskir miðlar hava skrivað, at millum ofrini eru millum annað sýrar og ein bosniari.
Løgreglan hevur ikki gjørt viðmerkingar til, um tjóðskapur hevur nakað við eitt møguligt motiv at gera.
Mikukvøldið noktaði Henrik Dahlström frá løgregluni í Örebro at svara, um løgreglan arbeiddi við onkrari ávísari teori.
/Ritzau/
