Leirvík: Hóast liggjandi góðveðrið seinastu tíðina, hava fleiri ungfólk í Leirvík eisini havt ein ávísan mann og eitt ávíst tiltak at hugsa um í øllum hitanum: Leygardagin 24. og sunnudagin 25. oktober í ár.
Navnið er Nicky Cruz, sum í síni tíð livdi eitt hart lív á gøtuni sum bandaleiðari í New York og við øllum tí, sum tað førdi við sær. Soleiðis var tað einaferð, men soleiðis er tað ikki longur!
Spennandi søgan um Nicky Cruz er longu kend um stóran part av tí kristna heiminum, tí hann er nógv brúktur sum talari í samkomum og aðrastaðni. Eitt av teimum støðunum, sum hann enn hevur til góðar at vitja er okkara land. Men nú kemur hann altso til Føroyar - longu í ár.
Tað hevur nevniliga eydnast ungfólki úr kristna umhvørvinum í Leirvík og leirvíkingi í útlegd at fáa henda vælkenda mann við teirri serstøku søguni til Føroyar.
Tey ungu fólkini eru komin væl ávegis við teimum praktisku og andaligu fyrireikingunum til hesa stórfingnu vitjanina í oktober. Ætlanin er at henda vitjanin skal spyrjast, samstundis sum menniskju skulu fáa eyguni upp fyri, hvussu Gud kann broyta eitt mannalív fullkomuliga.
- Søga hansara er bæði spennandi, ótrúlig og góð. Og tí ynskja vit, at føroyingar eisini fáa høvið at hoyra hana, siga tveir av fyrireikarunum, teir báðir leirvíkingarnir Jørgin Andreasen og Hans Fróði Hansen, sum í løtuni er búsitandi í USA. Tað er eisini hann, sum hevur fingið sambandið við Nicky Cruz.
Eitt lív á gøtuni
Tað eru helst mong sum hava lisið søguna um Nicky Cruz, ið heilt frá barnaárum av føldi seg óynsktan í sínum egna heimi í Puerto Rico og ikki minst í hesum heimi.
Foreldrini, ið hoyrdu til eina familju ið dýrkaði Satan og misbrúktu hann av tí allar ringasta: Pápin hevði fyri at læsa hann inni í dúgvuhúsinum, meðan mamman bart út segði, at hon ikki ynskti hann.
Út frá hesum fekk hann eina sera vánaliga byrjan uppá lívið, og hetta endaði við at hann rýmdi og flutti inn hjá beiggjanum sum búði í New York. Men sárini frá barnaárunum við honum allan vegin.
Nicky byrjaði eitt lív á gøtuni, og kom við í ein av bandunum, sum tá herjaðu í býnum - Mau Mau, her hann stutt eftir gjørdist leiðari. Hevði bandin ringt orð á sær frammanundan, so gjørdist tað ikki betir eftir at hann gjørdist leiðari.
Soleiðis gekk gerandisdagur hansara, og soleiðis hevði tað uttan iva gjørt í mong ár aftrat, um hann ikki hevði hitt ein serstakan mann á gøtuni ein dag. Hetta var David Wilkerson, sum í kristna heiminum er kendur víða hvar sum prædikumaður.
Henda hendingin fekk avgerandi ávirkan á restina av lívinum hjá bandaleiðaranum Nicky Cruz.
Drep prædikumannin
Hesin David Wilkerson hevði fingið eitt kall um at virka millum gøtubandar í New York. Og tað gekk hvørki verri ella betri, enn at teir báðir hittust ein dag - bandaleiðarin við tí ringa umdøminum og tann stillføri prædikumaðurin við tí góða boðskapinum.
David greiddi Nicky frá um gleðiboðskapin, og at tað var hóast alt ein ið elskaði hann fram um alt. Orðini um at Gud elskaði hann nú og altíð vildi gera tað, fullu ikki í góða jørð hjá hatska bandaleiðaranum.
- Eg var so illur við David, at eg hótti við at drepa hann, hevur Nicky seinni greitt frá. Men henda hóttanin helt kortini ikki Davidi aftur í arbeiði sínum.
Hann gjørdi ikki mætari enn at taka eitt stig aftrat, og fara beinleiðis inn á høvuðsskrivstovuna hjá Mau Mau-bandanum. Her endurtók hann boðskap sín, hóast Nicky stóð frammanfyri honum við knýttum neva, klárur at langa honum ein frammaná og kanska drepa hann.
David lat bara standa til: Hann stóð har og brosaði, samstundis sum hann bað fyri Nicky. Tvær vikur seinni skipaði David fyri eini møtirøð í grannalagnum, og her avgjørdi Nicky at fara fyri at lurta eftir prædikumanninum.
Aftur á gøtuna
Tað gekk ikki øðrvísi enn so, enn at Nicky og fleiri limir úr hansara banda vórðu frelstir á hesum møtum. Dagin eftir fóru teir allir sum ein á ta lokalu politistøðina fyri at lata inn aftur vápn, knívar og aðra útgerð sum teir høvdu brúkt í bandakríggjunum.
Nicky Cruz fór aftur í skúla, byrjaði at lesa í Bíbliuni og hevur síðani virkað sum prædikumaður og fyrilestrarhaldari kring allan heimin. Hann gloymdi kortini ikki vinir sínar á gøtuni, men vendi aftur til teirra, og helt áfram at boða teimum um Ein sum elskaði teir framvegis. Hetta arbeiðið hevur eisini fingið avgerandi týdning fyri teir nú fyrrverandi bandalimir.
Nicky Cruz hevur eisini skrivað fleiri bøkur, og komandi ár kemur ein filmur út um lív hansara. Filmurin er kallaður upp eftir teirri einu bókini “Run Baby Run”.
Áðrenn tað fáa so føroyingar høvið at hoyra hann live, tá hann í oktober mánaði kemur higar at siga frá lívi sínum, umvending síni og hvussu Gud hevur verið við honum nú hann er farin um tey 70!
Fakta:
Nicky Cruz
Føddur: 6. desember 1938 í San Juan, Puerto Rico
Søga: Fyrrverandi bandaleiðari og mordari í New York.Virkar nú sum prædikumaður kring allan heimin
Nú: Kemur til Føroyar í oktober mánaði
Tilfar: Hevur skrivað fleiri bøkur og í 2010 kemur filmur út um hann. Trailari frá filminum sæst á hesum linki: www.runbabyrunmovie.com.
