Fyri flestu føroyingar hevur besta enska deildin, Premier League, heilt serligan týdning. Nærum hvørt vikuskiftið ígjøgnum fleiri áratíggjur hevur enskur fótbóltur verið at sæð í føroyskum stovum.
Fríggjakvøldið byrjar enska Premier League aftur, og sermerkt við árinum í ár er, at talan er um 25’inda kappingarárið at deildin hevur itið Premier League.
Vit hava tí spurt Símun Samuelsen, ið fylgir Premier League sera nær, hvat hansara sterkasta minnið er við Premier League gjøgnum hesi 25 árini. Símun Samuelsen sigur, at tað eru fleiri løtur at velja í.
- Tað sum er brent fast í mínum minni er serstakliga innanhýsis tvídystirnir millum Roy Keane og Patrick Vieira, og kappingin millum United og Arsenal um tey mongu meistaraheitini, har feløgini í 9 ár á rað skiftust um at blíva enskir meistarar.
Símun Samuelsen sigur tó, at tað er ringt at avmarkað seg til eitt einstakt minni.
- Har eru eisini fleiri serstakar hendingar. Sum tá Paolo Di Canio skumpaði dómaran, tá Robbie Fowler sniffaði síðulinjuna, tá Cantona kickboksaði ein áskoðara, tá Eden Hazard sparkaði ein bóltdrong, og so sjálvandi tá Steven Gerrard gleið og Demba Ba skoraði. Tað fari eg aldrin at gloyma.
Seinastu kappingarárini er kappingin um at enda millum fýra tey ovastu í Premier League nógv harðnað, og ilt hevur verið at mett áðrenn hvørji lið fara at enda í topp fýra. Símun Samuelsen hevur tó sítt boð uppá topp fýra í Premier League fyri hetta kappingarárið.
- Mítt boð uppá topp fýra í ár er hetta. 1. Manchester City, 2. Tottenham, 3. Manchester United og nummar 4. Chelsea.
Sostatt hevur Símun Samuelsen bæði Liverpool og Arsenal, ið annars hava styrkt seg væl í summar, uttanfyri topp fýra plássini.
