Fyri aðru ferð í dag er ein §52 spurningur settur til Rigmor Dam, landsstýriskvinnu í skúlamálum, um kiksaðu landsroyndirnar í morgun.
Hesaferð er tað Óluvá Klettskarð, tingkvinna, sum spyr, hví tað so mangan miseydnast hjá mentamálaráðnum at fyriskipa landsroyndir. Víðari spyr hon, hvør hevur ábyrgdina av hesum, og um landsstýriskvinnan hevur kannað orsøkirnar, plaserað ábyrgdina rætta stað og tikið avleiðingarnar av, at landsins myndugleikar so mangan eru dumpaðir.
- Mentamálaráðið hevur sagt, veitarin hevur ábyrgdina, og so tykist ikki so nógv meira at henda. Soleiðis sær tað ið hvussu er út uttanífrá. Men hvør er frágreiðingin? Veitaran hava vit ikki hoyrt givið sína frágreiðing. Er ongin frágreiðing gjørd, so eigur landstýrismaðurin í Mentamálaráðnum at lata gera eina nágreiniliga frágreiðing, har veitarafrágreiðing er partur av frágreiðingini, leggja ábyrgdina á rætta stað og síðan seta trygga royndarskipan í verk, sigur Óluvá Klettskarð í viðmerkingunum til spurningarnar.
Víðari spyr hon, um landsstýriskvinnan ætlar at broyta skipan ella mannagongdir, so næmingar framyvir eru tryggir, og um hon er trygg við sína tøkni og førleikar at røkja uppgávuna framyvir.
Í viðmerkingunum sigur tingkvinnan, at mong okkara hava við stúran hugt at, hvussu illa og óheppið landsins myndugleikar í fleiri umførum hava dumpað í landsroyndum og øðrum royndum. Ferð eftir ferð hava vit upplivað næmingar komnar aftur sum av torvheiðum.
- Lærarar, næmingar og foreldur hava brúkt nógva tíð og orku at læra seg at brúka skipanirnar, sum Mentamálaráðið hevur lagt fyri skúlan at brúka. Góðar vegleiðingar eru útførdar, men hóast hetta, so hevur skipanin verið ónýtilig. Skúlin veit ikki at svara foreldrum og næmingum, roynir sum frægast við undanførslum ella onkrum hissini, skrivar Óluva Klettskarð og heldur fram.
- Mong fólkaskúlaforeldur eru hugstoytt. Og vit eru mong, ið staðfesta, at KT- skipanin í sambandi við landsroyndir, og royndir sum heild, als ikki er nøktandi. Vit nærkast tí støðu, at álitið á Mentamálaráðið er í vanda, og tíðin er búgvin til at ábyrgd verður staðsett.
