Tað er ofta langt ímillum, at nakað frættist frá tennisítróttini her á landi. Men seinastu dagarnar hevur tenniskappingin Niels L. Arge Open verið spæld á vallunum í Gundadali. Hetta var samstundis skipað sum ein FM-kapping.
FM varð annars hildin fyri ólavsøku, men av tí at danin Scot Christensen vann kappingina ta ferðina, mátti nýggju føroyameistari finnast. ÍSF hevur nevniliga ta reglu, at um tú ikki hevur búð í Føroyum í tvey samanhangandi ár, kanst tú ikki gerast føroyameistari.
Martin vann sannførandi
Fyrstu dystirnir í Niels L. Arge Cup vórðu spældir hósdagin, og týsdagin varð komið fram til finaluna.
Tað vóru teir báðir Martin Simonsen og Jón Brekku, sum høvdu spælt seg í finaluna, og Martin dró longra stráið í tí dystinum. Teir báðir hava spælt tennis í nógv ár og hava fleiri ferðir verið við á Oyggjaleikunum.Martin vann á Kristin Jensen í hálvfinaluni, og Jón basti Hjalta M. Joensen í næstseinasta dystinum.
Martin var undan kappingini styrkismettur sum nummar eitt og Jón nummar tvey. Tí var tað júst eftir bókini, at hesir báðir komu í finaluna. Martin vann dystin 2-0 við settúrslitunum 6-2 og 6-1.
Á pappírinum er hetta ein tryggur sigur, men dysturin var nógv drúgvari enn úrslitið kundi bent á. Fitt var av vindi, og tí var torført hjá leikarunum at spæla, men spenningur var allatíðina í dystinum.
Nýggjur almennur FM-vinnari í tennis er sostatt Martin Simonsen, og hann fekk steyp og 5000 krónur frá Niels L. Arge.
Í næstum verða kappingarnar hjá U14 og U18 hjá dreingjum og kvinnum leiktar.
