Vikuna fyri páskir skipaði Føroya Ríðingarfelag fyri tí áligu Búrøkt Cup kappingini. Kanska kennast fleiri betri við heitið Dixie Cup. Men nú hevur hon fingið navn eftir høvuðsstuðlinum hjá felagnum.
Hetta er kapping, sum skilir seg burtur frá øðrum kappingum hjá felagnum, við tað at hon heldur enn ferð, snýr seg um at reiðfólk og ross saman skula dystast í ymsum avbjóðingum, sum t.d. lop, ringríðing og at fara um portur. Hetta minnir nógv um summar greinar í teimum altjóða TREC kappingunum.
Vinnari í ár gjørdist Marner Joensen úr Kollafirði. Marner er kendir innan kappríðing og fyri nærlagni at venja rossini nógv, so tað var kanska ikki óvæntað, at hann endaði ovast á pallinum i Búrøkt Cup.
Nummar tvey gjørdist Anna Maria Holm Nolsøe og nummar trý Michel Nielsen, skrivar Føroya Ríðingarfelag á heimasíðuni rossfo.blogspot.com.
