Tá Marjun F. Danberg hevur spælt við Neistanum hevur talan næstan bara verið um fyrstaplássið ella annaðplássið í bestu kvinnudeildini, men í ár er øðrvísi, har Neistin hevur eitt fitt pettið upp til oddaliðini VÍF, VB og Kyndil.
Kvinnurnar hjá VÍF høvdu í kvøld møguleikan at vinna seg upp á oddasessin í Hvonndeildini, tá ið tær fingu vitjan av Neistanum, og vestmannagentur tóku av í einari góðari gongd, sum bara tykist at halda fram.
VÍF streyk avstað alt fyri eitt og kom á odda 4-0, og hóast tær eisini vóru á odda eitt nú 10-4, so stríddi Neistin seg væl inn aftur í dystin og fór til hálvleiks einans aftanfyri við trimum. Hálvleiksstøðan var nevniliga 12-9 til VÍF.
Alt fyri eitt í seinna hálvleiki minkaði Neistin niður í 12-11, men tættari enn tað sama komu tær ongantíð. VÍF slapp, hóast at stórskjúttin Liljan Djurhuus fór út við skaða, lættliga til málini, og við Marionnu Holm Jacobsen á odda vann VÍF greiðan 31-22-sigur.
Marjun F. Danberg ásannaði í samrøðu við Trónd Arge á Rás2 aftaná dystin, at tær í Neistanum runnu aftaná VÍF í dystinum í kvøld. Marjun viðgongur, at tað er strævið at byggja eitt nýtt lið upp, tí tað er ikki nakað hon hevur roynt áður í bestu kvinnudeildini áður.
TRÝST á PÍLIN undir MYNDINI, og hoyr samrøðuna Tróndur Arge gjørdi við Marjuna F. Danberg aftaná dystin í Vestmanna.
VÍF – Neistin 31-22 (12-9)
VÍF: Marianna Holm Jacobsen 8, Agnas Olsen 5, Heidi Maria Akselsen 4, Durita C. Jojic 4, Liljan Djurhuus 3, Randi Virgarsdóttir 3, Kathe Frederiksen 2, Ingibjørg Olsen 1, Sarah Bank Bjerg 1
Neisin: Eir Berg 5, Daniella Joensen 5, Marjun Danberg 3, Fríða á Dunga 3, Ingun Persson 2, Drós Ragnarsdóttir 1, Stina Madsen 1, Nicoleta Hansen 1, Rannvá Hanusson 1
