Tað var bara Noreg, sum hevði havt eina kvinnu sum stjórnarleiðara, tá floksleiðslan hjá Javnaðarflokkinum á fundi úti á Argjum seinnapartin leygardagin tann 16. januar í 1993 gjørdi av, at Marita Petersen skuldi loysa Atla Dam av sum løgmann. Tað var av sonnum stríðsval, tí valið stóð í millum tey trý landsstýrisfólkini hjá Javnaðarflokkinum, Maritu Petersen, Thomas Arabo og Jóannes Eidesgaard. Atli P. Dam hevði gjørt av at leggja frá sær – og boðaði frá hesum, tá samgongan millum Javnaðarflokkin og Fólkaflokkin varð skipað í januar í 1991.
Men hendan leygardagin í januar í 1993 var floksleiðslan hjá Javnaðarflokkin komin saman at taka dagar ímillum, hvør teirra skuldi taka við sum triði løgmaður Javnaðarfloksins – og valið fall á Maritu Petersen.
Nú hevur formansskapurin í Fólkatinginum gjørt av, at hon er millum tær týdningarmestu 30 kvinnurnar í ríkinum, sum hava havt týdning fyri fólkaræðið seinastu 100 árini – og sum tí skulu avmyndast á einum stórum málningi í Samrøðurúminum á Christiansborg – sum svar til málningin hjá Herman Vedel av teimum 30 monnunum, sum fyrireikaðu grundlógarbroytingina í 1915, sum førdi til, at kvinnur fingu valrætt.
Noreg fekk ta fyrstu kvinnuna í ein stjórnarleiðarasess í Norðurlondum í 1979, tá Gro Harlem Brundtland gjørdist forsætisráðfrú.
Og tað var bara Føroyar afturat Noreg, sum í síðstu øld hevði eina kvinnu sum stjórnarleiðara.
Hesar eru fyrstu kvinnuligu stjórnarleiðarar í teimum átta Norðurlondunum. Árstalið er, tá tær fyrstu ferð tóku við sum stjórnarleiðari:
1. Noreg: Gro Harlem Brundtland 1979
2. Føroyar: Marita Petersen 1993
3. Finnland: Mari Kiviniemi 2003
4. Áland: Viveka Eriksson 2007
5. Ísland: Jóhanna Sigurðardóttir 2009
6. Danmark: Helle Thorning-Schmidt 2011
7. Grønland: Aleqa Hammond 2012
8. Svøríki: Magdalena Andersson 2021
