Niclas Johannesen
?Ja, nú ætli eg mær at satsa upp á tónleikin her í Føroyum. Ið hvussu er eina tíð.?
Tað var ikki lygn ? hóast dagurin var 1. apríl í ár ? tá keyboardspælarin Magnus Johannesen blakaði keyboard og sofaborð í konteynaran og í kjalarvørrinum á Lómi setti kós móti Føroyum.
Havnarmaðurin hevði annars farnu tvey árini rættiliga fest sítt navn í danska tónleikaheiminum ? nærri at kalla innan sangleik? og revy?pallin í Keypmannahavn.
Nú stóð hugurin so aftur til føroysku luftina. Og longu nú hevur Magnus syrgt fyri, at hann fer ikki at ganga hendur í favn. Nýggi tónleikabólkurin Taxi er á skránni, nýggj fløguútgáva bíðar fyri framman, og tað sama gera næmingarnir í kvøldskúlanum, har Magnus í vetur fer at undirvísa í klaverspæli.
Magnus hevur eisini verið virkin í Frændum og á nýggju fløguni hjá Eyðuni Nolsøe ? Solo ? sum kom út fyri jól í fjør.
Spældi vil Elaine Page
Heim við sær í viðførinum hevur Magnus eisini nógv góð minni frá tveimum spennandi árum í Danmark, har hann eitt nú hevur spælt saman við heimskendu songkvinnuni Elaine Page.
?Hetta var til deyvaolympiaduna í Danmark, og eg var ein av tónleikarunum, sum varð biðin at spæla tónleik úr sangleikinum Chess.?
Alt byrjaði annars við, at Magnus hitti danska saxofonspælararan Holger Laumann á einum kompositiónsskeiði í Danmark. Holger manglaði ein kappelmeistara til sangleik, hann hevði skrivað, og so var Magnus spurdur.
Eftir henda kjansin gekk slag í slag. Boð vóru eftir Magnusi, og ofta vísti tað seg, at góði vinurin Holger var millummaðurin.
Eitt nú var Magnus repetetør (tað er ein sum situr saman við instruktørinum og roynir at fáa tónleikin at passa til leikgongdina) á Kongaliga Sjónleikarhúsinum í Keypmannahavn til ein leik, har Fuzzy hevði gjørt tónleikin.
Í oktober í 1996 kom ein av teimum bestu kjansunum, tá Magnus fyrst gjørdist repetetør og síðan fasur tónleikari til kenda sangleikin Skatteøen eftir Sebastian. Her hevði kendi Thomas Eje høvuðsleiklutin, og Magnus var knýttur til Skatteøen meginpartin av einum hálvum ári, og hann framførdi hesa tíðina sama tónleikin at kalla hvørt kvøld ? tilsamans yvir 100 ferðir.
Magnus sigur, at tað er spennandi at arbeiða í umhvørvi, har uppgávan hjá øllum er at fáa alt at rigga. Snøgt sagt at arbeiða í einum professionellum umhvørvi.
?Tónlistarliga gerst avbjóðingin tó ikki serliga spennandi í longdini, tí tú spælir sama repertoire kvøld eftir kvøld. Og tað gerst skjótt rutina. Tað eru ikki sangarar men sjónleikarar, ið syngja, og so mást tú halda teg innan rættiliga fastar karmar. Pláss er ikki fyri at improvisera nakað serligt. Tónleikarar, sum arbeiða í hesum umhvørvi siga, at eftir einum hálvum ári, kenna teir eina øgiliga trongd at royna aðrar avbjóðingar?, sigur Magnus, sum kortini onki hevur ímóti, at fara aftur til Danmarkar av og á, og spæla til sangleikir o.s.fr. í styttri tíðarbil. Hansara telefonnummar er sum vera man komið í bókirnar, hjá fólki, ið seta dagsskránna í hesum annars so afturlatna heimi. Og tað er ið hvussu er ein fyrimunur.
Plúmm aftur saman
Júst nú eru tað nógvir bóltar í luftini í Føroyum. Eitt nú spælir Magnus Johannesen við í nýggja bóltinum Taxi saman við Jón McBirnie, Kaj Johannesen og Kim Hansen. Bólkurin ætlar rættiliga at fara til verka eftir ólavsøku, tá Moira fyribils leggur árarnar inn, og Kim og Kaj fáa meira tíð til henda nýggja bólkin.
Men fyrst skal hann í studio saman við teimum tónleikarunum, alt í veruleikanum byrjaði við ? nevniliga plúmmarunum. Arnold Ludvig kemur allan vegin úr Kanada, Leivur Thomsen og Rógvi á Rógvu koma úr Danmark, meðan Finnur Hansen og Magnus eisini vera við. Og so er ikki at gloyma, at Holger Laumann eisini kemur til Føroya í hesum sambandi.
?Holger og eg hava skrivað tónleikin?, sigur Magnus og leggur dent á, at talan er ikki um eina jazzfløgu.
?Talan er meira um tónleik við íblástri úr klassiskum tónleiki og eisini fólkatónleiki. Vit hava lagt dent á at gera løg, har melodiurin kemur í fremstu røð. Og hetta verður bert tónleikur, okkum dáma væl at spæla.?
Farið verður í studio 9. juli, og ætlan er eisini at spæla onkra konsert í Føroyum, meðan allir útisetatónleikararnir eru savnaðir í landinum.
