Tað vendir nógv øðrvísi undan býráðsvalinum í Fuglafirði, enn tað gjørdi, tá ið býráðsval var fyri fýra árum síðani.
Fyri fýra árum síðani vóru tríggir listar á kommunuvalinum í Fuglafirði. Aftur í ár eru tað tríggir listar, men tað eru fleiri broytingar sammett við í 2016.
Ein broyting er, at Sigurð S. Simonsen, sum fyrstu ferð varð valdur í 1992 og hevur verið býráðslimur síðani og borgarstjóri frá 2001 og fram til 2012, ikki er uppstillaður.
Ein onnur broyting er, at listi D ikki er til longur og at nýggjur listi, listi Á, bjóðar seg fram.
Á valinum fyri fýra árum síðani vunnu teir tríggir listarnir, B, D og F, trý umboð í býráðið hvør.
Á lista B vórðu Edva Jacobsen, Eyðun á Lakjuni og Sigurð S. Simonsen vald.
Á lista D vórðu Sonni á Horni, Árant Berjastein og Magni Jøkladal valdir.
Á lista F vórðu Eivin Breiðaskarð, Kristian Petersen og Ólavur Larsen valdir.
Tey seks á lista D og F skipaðu samgongu og valdu Sonna á Horni til borgarstjóra. Hann hevði tá verið borgarstjóri í fýra ár.
Tríggir býráðslimir bjóða seg ikki fram aftur. Umframt Sigurð S. Simonsen eru tað Kristian Petersen og Árant Berjastein.
Nú er Sonni á Horni uppstillaður á nýggja lista Á. Saman við honum á listanum er eitt nú Ólavur Larsen, sum fyri fýra árum síðani varð valdur á lista F.
Magni Jøkladal, sum varð valdur saman við Sonna á Horni og Árant Berjastein, er nú uppstillaður á lista B saman við eitt nú býráðslimunum Edvu Jacobsen og Eyðuni á Lakjuni.
Tann einasti av teimum trimum, sum fyri fýra árum síðani varð valdur á lista F, og sum framvegis er á listanum, er Eivin Breiðaskarð.
Býráðið í Fuglafirði, sum varð valt í 2016
##med2##
