Fótbóltsevnini hevur hann ikki frá fremmandum. Mammubeiggin, Meinhardt Dalbúð, var fyri tjúgu árum síðani toppsjútti á ÍF liðnum, sum vann FM heitið, og í faðirættina hava verið og eru eisini nógvir evnaríkir fótbótlsspælarar, t.d. Heðin á Lakjuni hjá KÍ.
Magni á Lakjuni hevur leingi verið roknaður millum teir við góðum fótbóltsevnum, og fyri fimm árum síðani royndi hann seg í Vejle, har Allan Simonsen var venjari. Tað spurdist einki burturúr ta ferðina, og síðani hevur Magni á Lakjuni brúkt mestu tíðina í Keypmannahavn, har víðkaða maskinmeistaraprógvið er fingið innanborða.
Nú er eitt ár síðani hann kom til HB. Í ár hevur hann verið nógv skaddur, men hesa síðstu tíðina hevur hann verið við hvørja ferð, og mikukvøldið fekk hann fyri fyrstu ferð loyvi at royna seg í altjóða uppgávu.
Og tað var vorðið seg sum fyrsta roynd, tí Magni á Lakjuni gjørdist fyrsti føroyingurin, sum skoraði á Tórsvølli. Eftir eina eitt sindur laka byrjan, spældi Magni á Lakjuni seg upp at vera mest eyðsýndi framrættaði spælarin, og tíðliga í 2. hálvleiki var hann tvær ferðir uppá spæl. Fyrru ferðina fekk hann mál, og seinnu ferðina eydnaðist tað finsku verjuni at sparka burtur, áðrenn bólturin fór um strikuna.
? Í báðum førunum varð eg sera væl spældur av viðspælarunum. Eg minnist ikki rættuliga, men eg haldi, at í tí fyrra førinum kom bólturin frá Rúna Nolsøe. Eg var vísur í, at eg var ikki rangstaddur, og tá málverjin kom út ímóti mær, kendi eg meg nóg kaldan at seta bóltin framvið honum í staðin fyri bara at smekka til. Í tí seinna førinum spældi Súni Fríði Johannesen meg sera væl, men tíverri kom ikki meiri burturúr, sigur Magni á Lakjuni, ið eins og viðspælararnir var ógvuliga troyttur, eftir at hava spælt á grasinum.
Lítli møguleikin er har
Í fjør vann HB 2-0 á heimavølli móti VPS Vaasa, men tað var ikki nóg mikið at koma víðari í kappingini, tí finska liðið vann 4-0 á heimavølli.
Millum annað út frá omanfyri standandi veruleika er tað ikki undarligt, at HB menninir iðra seg serliga nógv um, at teir skuldu loyva mótstøðumonnunum at skora eitt mál á útivølli.
? Fyritreytirnar eru verri enn tær vóru í fjør, men vit fara at spæla fyri møguleikanum, sum vit hava. Eydnast tað okkum at vinna 1-0, so sleppa vit víðari í kappingini, men tað verður torført, er boðið hjá HB monnunum.
