? Niðurstøðan av valinum er greið, sigur Zakarias Wang.
? Fyri fyrstu ferð síðan fólkaatkvøðuna í 1946 hava loysingarsinnaðu flokkarnir ikki meiriluta í móti sær í tinginum.
Í 1946 var ein fólkaatkvøða í Føroyum, har spurt varð, hvussu Føroyar skuldu skipast. Sum sjálvstøðugt land ella sum ein partur av Danmark.
Úrslitið var at meiriluti - hóast hann ikki var stórur, var fyri, at Føroyar skuldu gerast sjálvstøðugar.
? Men so hendi tað, at danir vildu ikki seta tað í verk, sum var samtykt við fólkaatkvøðuna og teir fingu hjálp frá trimum flokkum í Føroyum. Teir vóru Sambandsflokkurin, Javnaðarflokkurin og Sjálvstýrisflokkurin.
? Og líka síðani hava hesir tríggir flokkar havt meirilutan í tinginum.
Nú er øðrvísi
Men við valið hósdagin í farnu viku kom broyting í.
Fyri fyrstu ferð síðan 1946 hava teir loysingarsinnaðu flokkarnir - í hesum føri Tjóðveldisflokkurin og Fólkaflokkurin, fingið so góða undirtøku í tinginum, at teir ikki hava meirilutan ímóti sær.
A og E hava aftaná valið 16 tinglimir, meðan hinir tríggir B,C og D bert hava 15.
Jenis av Rana og Miðflokkurin hava sagt, at hann er »líkaglaður« við handan spurningin, so hann fer neyvan at gera ónáðir í tinginum.
? Tí kann nývalda tingið samtykkja, at heita á landsstýrið um at taka upp samráðingar við danir um broytingar í ríkisviðurskiftunum, sigur Zakarias Wang, stjórnmálafrøðingur.
A og E er rættasta samgongan
Hvør er so tann rættasta samgongan í øllum hesum kombinatiónunum?
? Tann rættasta samgongan er eftir míni meting, at Tjóðveldisflokkurin og Fólkaflokkurin fara saman.
? Hesir báðir flokkar fóru til val uppá at gera broytingar í ríkisfelagsskapinum og teir hava fingið ein einastandandi møguleika. Teir hava, sum sagt, ikki meiriluta ímóti sær.
? Hartafturat er rættiliga óhugsandi, at eitt løgmansevni úr hesum flokkunum skuldi fingið seytjan atkvøður ímóti sær, tí allir hinir flokkarnir - B, C, D og H - hava peikað á antin Anfinn Kalsberg ella Høgna Hoydal, sum samráðingarleiðara.
Polistiskt sjálvmorð
Men kann Fólkaflokkurin ikki skipa eina borgarliga samgongu, saman við Sambandsflokkinum ístaðin?
? Jú, tað kann hann gott, men tað er at gera politiskt sjálvmorð. Flokkurin fór til val við tí fyri eygað at gera broytingar í viðurskiftunum millum Føroyar og Danmark, og tað er millum annað tí, at teir hava fingið so stóra undirtøku.
? Tað fer at koma teimum aftur um brekku, um teir ikki brúka møguleikan fyri eini sjálvstýrissamgongu nú, sigur Zakarias Wang.
Javnaðarflokkurin uttanfyri
Samstundis skilur Zakarias Wang støðuna hjá Fólkaflokkinum, at teir ætla at halda Javnaðarflokkin uttanfyri.
? Javnaðarflokkurin er ikki samdur við hinum báðum um broytingarnar. Javnaðarflokkurin fór til val við tí lyftið, at gera broytingar í ríkisviðurskiftunum, men innanfyri ríkisfelagsskapin.
? Hetta sampakkar ikki við tað, sum Fólkaflokkurin og Tjóðveldisflokkurin ætla og tí er rættast, at Javnaðarflokkurin verður uttanfyri.
Annars sigur Zakarias Wang, at valúrslitið kom óvart á hann.
? Eftir úrslitinum á fólkatingsvalinum at døma, so vóru ikki útlit til at Fólkaflokkurin og Tjóðveldisflokkurin fóru at fáa eina so stóra framgongd, sigur hann
