Loksins vunnu Sjúrður og Teis - Rói tapti

Sjúrður Olsen og Teis Horn Rasmussen hava saman við liðfeløgunum í Tønder verið fyri nógvum teprum tapum uppá eitt og tvey mál í næstbestu donsku hondbóltsdeildini hetta kappingarárið.

Í dag koppaði tað endiliga til Sjúrð, Teis og hinar í Tønder, ið vann 33-32 á Vendsyssel á útivølli. Í steðginum var støðan javnleikur 17-17. 

Føroyingarnir hjá Tønder gjørdu góðan mun í málskjótingini. Sjúrður skoraði seks mál og Teis skoraði fimm mál.

Rói Berg Hansen og liðfelagarnir í HØJ snávaðu í oddastríðnum við at tapa greitt 31-38 fyri Roskilde á útivølli. Roskilde var á odda 19-17 í steðginum. Rói skoraði trý mál fyri HØJ, ið nú er trý stig aftanfyri oddaliðið, Midtjylland.

Brandur Halgirsson fekk tvær útvísingar og gjørdi sítt í verjuspælinum hjá Ajax, ið spældi javnleik 25-25 móti FIF á útivøllli. Í steðginum var FIF á odda 15-13.

Komandi leygardag tekur Tønder móti Roskilde. HØJ tekur sama dag móti  FIF á heimavølli, og Ajax tekur móti oddaliðnum, Midtjyllandi.

Í morgin klokkan 14 spæla Leivur Mortensen og liðfelagarnir í Odder móti Sydhavsøerne á útivølli.