Í september tendraði Sunda kommuna á fyrstan tíð tey nýggju ljósini í gjónni í Gjógv. Vónin var, at nýggja átakið skuldi draga ferðafólk og føroyingar til lítlu bygdina norðantil á Eysturoynni.
Tað tykist eisini at hava eydnast, tí hóast ætlanin upprunaliga var, at ljósini bara skuldu lýsa frá september til november, so hevur Sunda kommuna, nú vit eru í januar, avgjørt at lata ljósini lýsa fram til 1. apríl.
Á heimasíðuni hjá kommununi verður upplýst, at tað er vegna stóru undirtøkuna, at kommunan hevur valt at leingja um tíðarskeiðið tá ljósini eru tendraði.
Tað er felagið Gjómaður, ið hevur sett ljósini upp og handað kommununi teimum.
