Tzipi Livni, sum er uttanríkisráðharri í Ísrael og formaður í stjórnarflokkinum Kadima, vil hava Ehud Olmert at fara úr forsætisráðharraembætinum. Orsøkin er, at ísraelska ákæruvaldið ætlar at stevna Olmert fyri svik. Ríkisákærin hevur tó sagt, at hann ætlar at lata eina serliga kanningarnevnd avhoyra Olmert, áðrenn endalig avgerð verður tikin um at stevna honum fyri rættin.
Ehud Olmert hevur fyrr sagt, at hann fer at leggja frá sær sum forsætisráðharri, tá tjóðartingsval verður í Ísrael í februar. Tzipi Livni heldur, at hann eigur at fara frá longu nú heldur enn at bíða eftir valinum, men sambært ísraelskum fjølmiðlum hevur Olmert ongan skund.
Skuldi tað hent, at Ehud Olmert sigur forsætisráðharraembætið frá sær, skal Tzipi Livni røkja embætið, til ein nýggj stjórn er skipað aftan á valið í februar. Politiskir eygleiðarar í Jerusalem siga, at kann hon taka við eftir Olmert longu nú, fer tað uttan iva at styrkja støðu hennara til valið og til eina møguliga stjórnarskipan aftan á valið.
