Tottenham hevur tikið øll á bóli í kvøld og sent Manchester City úr Champions League. Í avbera hendingaríkum dysti á Etihad leikvøllinum vann Manchester City 4-3, men tapur samanlagt. Liverpool vann í Portugal og skal møta FC Barcelona í hálvfinaluni.
Tottenham hevði ein 1-0 sigur við í skjáttini til Manchester, men eftir bara fýra minuttir hevði Raheem Sterling skorað til 1-0. Síðani ber illa til at greiða frá øllum sum hendi, tí aftaná 21 minuttir stóð 3-2 til Manchester City, sum eisini var hálvleiksstøðan.
Í seinna hálvleiki skoraði Sergio Aguero málið, sum fyribils sendi heimaliðið víðari, men innskifti Fernando Llorente vildi tað øðrvísi. Hann skoraði til 4-3, sum eisini bleiv endaliga úrslitið. Við sigrinum í fyrra dystinum, so vinna gestirnir við fleiri skoraðum málum á útivølli.
Tað var stórur dramatikkur í yvirtíðini, tá Raheem Sterling helt at hann hevði sent Manchester City víðari, eftir ein brølara frá danskaranum í Tottenham, Christian Eriksen. Eftir hjálp frá VAR bríkslaði dómarin fyri rangstøðu og Tottenham slapp við skrekkinum, og er í hálvfinaluni, sum verður móti Ajax.
Liverpool lættliga víðari
Liverpool kom samanlagt lættliga víðari í uppgerðini móti FC Porto. Teir reyðu úr Onglandi vunnu fyrra dystin 2-0 á Anfield og vóru tí stórir favorittar at koma víðari. FC Porto legði nógv fyri frá byrjan, men við fyrsta skotinum á portugisiska málið skoraðu gestirnir.
Síðani hevði Liverpool fult tamarhald á støðuni og vann 4-1. Samanlagt vinnur Liverpool 6-1 og skal spæla móti FC Barcelona í hálvfinaluni.
Champions League 1/4 finalur:
FC Porto (0) - (2) Liverpool 1-4
0-1 Sadio Mané
0-2 Mohamed Salah
0-3 Roberto Firmino
1-3 Eder Militao
1-4 Virgil van Dijk
Liverpool vinnur samanlagt 6-1
Manchester City (0) - (1) Tottenham 4-3
1-0 Raheem Sterling
1-1 Heung-Min Son
1-2 Heung-Min Son
2-2 Bernardo Silva
3-2 Raheem Sterling
4-2 Sergio Aguero
4-3 Fernando Llorente
Tottenham vinnur samanlagt 4-4 við fleiri útivallarmálum
