Dreingirnir á A-liðnum hjá Sunda Judofelag hava í allan vetur víst seg at havt best tak á kappingini, og hóðast teir ikki hava vunnið allar dystirnar, hava teir alla kappingina havt munin á hinum liðunum.
Tískil var spenningurin ikki heilt í topp áðrenn hetta síðsta umfarið, tí óvanliga illa skuldi gangast í hond, um meistaraheitið skuldi gleppa teimum av hondum.
Og sundadreingirnir vístu seg eisini at liva upp til góðu úrslitini í vetur, og teir vunnu allar sínar dystir í hesum seinasta umfarinum.
Úrslitini av dystunum í dreingjadeildini sunnudagin vóru:
SJFa - SJF b 50-0
HJFa - HJFb 50-0
SJFb - HJFb 30-20
SJFa - HJFa 26-11
SJFa - HJFb 50-0
SJFb - HJFa 20-27
Endaliga úrslitið í dreingjadeildini gjørdist, at Sunda Judofelag a gjørdist føroyameistari við 44 stigum, Havnar Judofelag a gjørdist nr. 2 við 38 stigum og Havnar Judofelag b gjørdist nr. 3 við 16 stigum, Sunda Judofelag b nr. 4 við 12 stigum og Klaksvíkar Judofelag endaði á 5. plássi við 10 stigum.
Unglingar
Í unglingadeildini varð eisini stórur spenningur, tí í teimum 4 umførunum, sum høvdu verið fyrr í vetur hevði Sunda Judofelag vunnið tveir dystir og Havnar Judofelag 2.
Sostatt varð greitt, at avgerðin skuldi falla hetta seinasta umfarið.
Og eisini í hesari deildini gjørdist tað Sunda Judofelag, ið fór av stað við gullinum.
Endaliga úrlitið hjá unglingunum gjørdist, at Sunda Judofelag gjørdist føroyameistari við 6 stigum, meðan Havnar Judofelag gjørdist nr. 2 við 4 stigum.
Sosialurin ynskir føroyameistarunum til lukku við heiðursmerkjunum.
Føroyameistarakappingin fyri einstaklingar verður í Havn 8. apríl.
