Fíggjarmálaráðið hevur kallað fjølmiðlarnar á tíðindafund í Fíggjarmálaráðnum í dag klokkan 13:30 um fíggjarlógaruppskotið. Hetta er samstundis, sum tingfundur verður settur í Løgtinginum, har framløga sum vant er eitt av málunum og har fíggjarlógaruppskotið verður lagt fram.
Saman við fíggjarlógaruppskotinum verða einar 20 fylgilógir lagdar fram, sum eru broytingar til tað uppskot, sum liggur í tinginum frá gamla landsstýrinum.
Men talan verður um stórar broytingar. Ein tann størsta er flatskatturin, sum landsstýrið ætlar at seta í gildi á nýggjárinum. Hitt stóra málið er málið um at skatta pensjónir við inngjaldi heldur enn útgjaldi.
Sum skilst er hækkingini í ríkisstuðlinum ikki við í fíggjarlógaruppskotinum. Hetta er tí, at samráðingarnar ikki eru byrjaðar enn. Tað verður danski fíggjarmálaráðharrin, Bjarne Corydon og Jørgen NIclasen, landsstýrismaður í fíggjarmálum, sum skulu samráðast um hægri blokkstuðul.
Ætlanin er framvegis,at fíggjarlógin skal javnviga í 2016. Tað merkir, at ein hálv milliard skal sparast, ella 100 milliónir krónur um árið ella at tilsvarandi eyka inntøkur skulu finnast.
Alt hetta frætta vit meira um klokkan 13:30 í dag.
