Fiskivinnupolitikkur
Búskapar- og fíggjarpolitikkur
Familjupolitikkur
Ungdómspolitikkur
Bústaðarpolitikkur og
Arbeiðsmarknaðarpolitikkur
Politikkøkini mentan, umhvørvi, útbúgving, eldri, heilsu og javnstøðu verða til viðgerðar og samtyktar á landsfundi ella landsstevnu seinni í heyst.
Niðanfyri eru brot úr samtyktu politikkøkjunum, sum eisini verða almannakunngjørd á heimasíðu floksins í komandi viku.
Brot úr samtyktu politikkøkjunum
Fiskivinnupolitikkur
Endamálið við fiskivinnupolitikki Javnaðarfloksins er, at høvuðsvinnan ber seg og kastar sum mest av sær til samfelagið og til teirra, sum virka í vinnuni. Javnaðarflokkurin byggir tí fiskivinnupolitikkin á hesar grundsúlur:
Lívfrøðiliga og búskaparliga burðardygga fiskivinnu
Økta virðisøking
Skipaða atgongd fyri nýtslu av fólksins ogn
Javnaðarflokkin staðfestir at landsins tilfeingi er ogn Føroya fólks. Hetta er galdandi fyri livandi tilfeingi í sjónum og alt annað náttúrutilfeingi, sum verður gagnnýtt vinnuliga. Gongdin má vendast frá, at ogn Føroya fólks lutvíst verður misrøkt og framhaldandi verður handilsvøra hjá nøkrum fáum. Málið er, at vinnan, samfelagið, og Føroya fólk fær mest møguligan ágóða av tilfeinginum.
At fiskatilfeingið er ogn Føroya fólks eigur eisini verða staðfest við, at eingi rættindi verða lutaði út ókeypis. Ágóðin av hesum skal koma samfelagnum og ikki einstøkum til góðar. Royndirnar í 2011 við gjaldi fyri ein part av makrelkvotuni og við uppboðssølu av einum parti hava víst, at fiskatilfeingið hevur sera stórt virði. Hetta er virði, sum skulu koma Føroya fólki til góðar við øktari vælferð og lægri skattatrýsti.
Búskapar- og fíggjarpolitikkur
Ein sterkur búskapur er neyðugur fyri at vit hava ráð til vælferðarsamfelagið í framtíðini. Samstundis eru vælvirkandi vælferðarskipanirnar neyðugar fyri, at búskapurin kann gerast enn sterkari í framtíðini.
Komandi árini skulu vit hava strukturbroytingar í bæði almenna og privata sektorinum. Og vit skulu hava eina umlegging av skattabyrðuni, soleiðis at vit eru fleiri um at rinda og soleiðis at vit krevja pengar inn, har tað ger minst avleiðingar.
Familjupolitikkur
Endamálið við familjupolitikkinum hjá Javnaðarflokkinum er, at familjurnar sjálvar fáa møguleikan at leggja til rættis teirra lív. Samfelagið skal veita tilboð, sum tryggja familjunum frælsi til sjálvar at fylgja sínum dreymum um tað góða lívið, og veita tryggleika til tey, ið hava tað svárt. Ein vælvirkandi familjupolitikkur tryggjar framburð í samfelagnum.
Ungdómspolitikkur
Einki er týdningarmiklari enn ungdómurin. Nýskapan, arbeiðshugur og sosial sambond millum ungdóm gera meira enn nakað annað av, hvussu framtíð Føroya sær út. Tí hevur tað alstóran týdning, at vit sum samfelag veita ungdóminum góðar umstøður. Ungómspolitikkurin hjá Javnaðarflokkinum byggir á hesar høvuðstættir:
Útbúgving á hægsta støði
Betri karmar fyri mentan og ítrótti
Fólkaræði fyri øll
Bústaðarpolitikkur
Kjarnin í bústaðarpolitikki Javnaðarfloksins er at skipa Húsalánsgrunnin av nýggjum sum eitt virkið alment bústaðarpolitiskt amboð. Endamálið er at røkka samfelagsgagnligum bústaðarpolitiskum málum, sum privatu fíggingarstovnarnir ikki leggja í ella evna at røkka undir vanligum marknaðarfortreytum á føroyska bústaðarmarknaðinum.
Í fyrsta lagi snýr tað seg um at orða heimildarnar hjá Húsalánsgrunninum av nýggjum, so høvuðsdenturin verður lagdur á fígging til íbúðafeløg og íbúðastovnar til leiguíbúðir og lutaíbúðir.
Arbeiðsmarknaðarpolitikkur
Arbeiði til allar hendur er týðandi lutur í sosialdemokratisku visjónini. Arbeiði skapar vøkstur í samfelagnum og ein virkin arbeiðsmarknaðarpolitikkur er eitt avgerandi amboð at røkka hesum máli. Arbeiðsmarknaðarpolitikkurin er sostatt eisini eitt amboð fyri at at skapa vøkstur og menning.
Fleiri av siðbundnu vinnunum eru í minking og stór arbeiðspláss hvørva. Hetta merkist serliga meint uttan fyri miðstaðarøkið. Ein virkin arbeiðsmarknaðarpolitikkur eigur at vera ein krummtappur í broytingartilgongdini og er eitt amboð, ið skapar eina brúgv millum nútíð og fortíð, soleiðis at ongin dettur niðurímillum, tá ið vinnumynstrið í samfelagnum broytist.
Aðrar samtyktir á Landsstevnu Javnaðarfloksins:
Bygnaðarbroytingar í sjúkrahúsverkinum
Javnaðarflokkurin staðfestir, at sjúkrahúsverkið umfatar og skal umfata øll trý sjúkrahúsini. Til tess at kunna varðveita og styrkja øll sjúkrahúsini, er neyðugt at fremja bygnaðarligar broytingar.
Hesar broytingar eiga at verða væl viðgjørdar og kjølfestar í álitisfullum samstarvi við leiðslur, starvsfólk og øll sum varða av hesum týdningarmiklu stovnum.
Henda viðgerð tekur tíð. Tí hevur Javnaðarflokkurin gjørt av, at málið verður IKKI lagt fram á ting í hesum valskeiðinum.
Um treytir fyri fiskiloyvi í bólki 5a
Landsstevna Javnaðarfloksins tekur ikki undir við broytingunum hjá landsstýrismanninum í fiskivinnumálum um treytir fyri fiskiloyvi hjá fiskiførum í bólki 5, sum herða munandi um krøvini fyri at vera fulltíðar útróðramaður.
Nýggja treytin um inntøku á 400.000 krónur er alt ov ógvuslig og krevur Landsstevna Javnaðarfloksins, at inntøkumarkið alt fyri eitt verður lækkað, sum landstýrismaðurin áður hevur givið tilsøgn um.
Arbeiðseftirlitið
Landsstevna Javnaðarfloksins harmast um niðurlagingina og avtøkuna av Arbeiðseftirlitinum, sum landsstýrismaðurin í vinnumálum hevur framt við at avtaka Arbeiðseftirlitið sum sjálvstøðugan stovn og skerja orku og førleikar hjá stovninum niður í onki.
Tá landsstýrismaðurin haraftrat tosar um at privatisera arbeiðsuppgávurnar hjá Arbeiðseftirlitinum, fer Javnaðarflokkurin undir ongum umstøðum at góðtaka hetta.
Tvørturímóti áleggur Landsstevnan fólkavaldu umboðum floksins at krevja og virka fyri, at Arbeiðseftirlitið skal hava neyðuga orku og starvsfólk við teim førleikum, sum skulu til fyri at røkja allar lógarkravdar uppgávur.
