Nýsetti landsstýrismaðurin í heilsumálum, Kaj Leo Holm Johannesen, hevur verið á ferð í Suðuroy, har hann hevur kunnað seg við umstøðurnar, og virksemið á Suðuroyar Sjúkrahúsi.
Við sær hevði hann aðalstjóran í heilsumálaráðnum, Turið Arge, og somuleiðis vóru stjórarnir á hinum báðu sjúkrahúsinum við á ferðini, nevniliga, Steinar Eirikstoft, stjóri á Landssjúkrahúsinum, og Alexandra á Dul, stjóri á Klaksvíkar Sjúkrahúsi.
##med2##
Pauli Henryson, stjóri á Suðuroyar Sjúkrahúsi, sigur, at tey vístu teimum runt á øllum deildunum á sjúkrahúsinum, har landsstýrismaðurin, og hinir gestirnir, eisini fingu høvi til at heilsa uppá starvsfólkini.
Tey fingu kunning um virksemið á sjúkrahúsinum, hvørjar kanningar verða gjørdar, og hvørjar viðgerðir, og onnur tilboð, tey hava, bæði til sjúklingar í Suðuroy sjálvari, men eisini til sjúklingar í øllum landinum sum heild.
##med3##
Eitt nú hevur Suðuroyar Sjúkrahús sera góðar umstøður til fysioterapi og endurvenjing, har tey eisini hava ein hyl við serlig heitum vatni til venjingar.
Á Suðuroyar Sjúkrahúsi hava tey eisini eina pínuklinikk, sum er tann einasta í landinum, og hagar fólk úr øllum landinum leita sær fyri at fáa linnandi viðgerð.
##med4##
Tey vístu eisini landsstýrismanninum nýggja CT skannaran, sum tey hava havt á Suðuroyar Sjúkrahúsi í fleiri mánaðir, men sum tey enn ikki hava fingið tikið í nýtslu, tí tey tey mangla radiografar til at arbeiða við skannaranum.
Tað vóna tey at fáa í rættlag næsta ár.
