Rólant Waag Dam
Hóast Kaj Leo Holm Johannesen seinnapartin í gjár lætt og elegant leyp tann partin um, so er tað ein veruleiki, at hann sjálvur og hansara landsstýrisfólk, akkurát einki missa við nýggja lógaruppskotinum um samsýning og eftirløn landsstýrismanna. Tvørturímóti gevur hann sær sjálvum eina lønarhækkan á 17.558 krónur um mánaðin, umframt at lønin hjá hansara landsstýrisfólkum hækkar við 14.535 krónum um mánaðin, um løgmaður heldur fram eftir næsta val og hann tilnevnir somu landsstýrisfólk.
Ógvusliga lønarhækkingin er ein av tveimum broytingum, sum Kaj Leo Holm Johannensen og hansara landsstýrisfólk fara at merkja. Men tað segði løgmaður einki um, tá hann seinnapartin í gjár kendi seg noyddan at koma við eini almennari viðmerking til málið, eftir at bæði Miðlahúsið og Kringvarp Føroya hava varpað ljós á lógaruppskotið.
Hin broytingin, sum Kaj Leo Holm Johannesen heldur ikki nevnir í almennu viðmerking sínari, er, at lógaruppskotið eisini tryggjar honum 15 prosent av lønini í eftirløn. Altso fáa Kaj Leo Holm Johannesen og landsstýrisfólk hansara fyrst og fremst eina ovurhondsstóra lønarhækkan, um tey eisini verða landsstýrisfólk, tá hetta valskeiðið er av, og 15 prosent í eftirløn, sum landið rindar og sum tey annars ikki hava rætt til í dag.
Fortelur ikki alt
Heldur ikki hetta nevndi Kaj Leo Holm Johannesen í gjár. Hinvegin segði hann millum annað soleiðis:
»Verður uppskotið um samsýning og eftirløn landsstýrismanna samtykt í Løgtinginum, fáa landsstýrisfólk verri sømdir eftir komandi val. Verða eftirlønarviðurskiftini broytt, ótíðarhóskandi skattafríu ágóðarnar tiknar av, og ruddað verður upp í fráfaringarlønunum, er talan í veruleikanum um eina stóra sparing.
Fjølmiðlar tykjast kortini hava størri áhuga í at petta uppskotið hjá óheftu nevndini sundur fyri at finna eina rámandi yvirskrift. Viðgerðin gerst villleiðandi, tí uppskotið er ein heild og má viðgerast sum ein heild. Tað nyttar ikki bara at greiða frá, hvat løgmaður og landsstýrisfólk fáa. Tað er sanniliga eisini neyðugt at upplýsa, hvat tey missa við uppskotinum
Uppskotið, sum óhefta nevndin hevur orðað, leggur upp til, at løgmaður og landsstýrisfólk fáa hægri løn, men uppskotið strikar eisini gyltu eftirlønarskipanina, ótíðarhóskandi skattafría borðfæið og kostnaðarendurgjaldið. Hetta fer í krónum og oyrum at merkja ein munandi niðurskurð hjá landsstýrisfólkum. Samstundis sparir tað almenna pening«.
Missa einki men fáa bara
Tað er rætt, at nýggj landsstýrisfólk fara at fáa verri sømdir, um uppskotið um samsýning og eftirløn landsstýrismanna verður samtykt. Tað er eisini rætt, at talan verður um eina sparing hjá tí almenna. Men tey landsstýrisfólkini og tann løgmaðurin, sum sita í dag, fáa bara fyrimunir við nýggju skipanini. Hetta tí, at tey umframt lønarhækkanina, fría ráðharrabilin og nýggja pensjónsinngjaldið, eisini varðveita øll vunnin rættindi og gyltar eftirlønaravtalur.
Løgmaður minnir í viðmerking sínari á, at tað er umráðandi upplýsa, hvat landsstýrisfólkini missa við nýggju skipanini. Samstundis gloymir løgmaður – tilvitað ella ei – at upplýsa, at hann og hansara landsstýrisfólk bara fáa og einki missa við broytingaruppskotinum, sum hann hevur lagt fyri tingið.
- Tað er rætt, at eg einki missi við nýggju skipanini, sigur Kaj Leo Holm Johannesen, løgmaður, sum váttar, at hann við nýggja uppskotinum fær eina lønarhækkan. Hann hevur annars ikki stórvegis viðmerkingar til málið, áðrenn tað hevur verið fyri í tinginum fríggjadagin.
Vit ætlaðu annars at spyrja løgmann, hvat hann heldur um, at hansara løn verður so nógv hægri, samstundis sum hann varðveitir sína gyltu eftirløn, um hann heldur fram sum løgmaður eftir valið. Tað hevur hann ikki nakra viðmerking til, áðrenn málið hevur verið viðgjørt í tinginum, umframt at hann heldur ikki hevur nakra meining, um tað hevði verið rættari at gjørt eina serstaka lønarskipan fyri tey, sum longu hava vunnið sær fulla eftirløn og samstundis fáa lønarhækkan, sum eitt nú løgmaður sjálvur.
- Hatta er ein fínur spurningur til lønarnevndina, sigur løgmaður.
