Fríggjadagin ringdu fólk frá Løgmansskrivstovuni á Sosialin at boða frá, at Føroya Løgmaður, Kaj Leo Johannesen, ikki longur ynskir at halda Sosialin.
Tað hevur til allar tíðir verið soleiðis, at landsstýrið hevur hald upp á bløðini. Eisini verða bløðin borin heim til landsstýrisfólk og løgmann.
Sosialurin hevur roynt at ringt til løgmanni fyri at frætta, hví Løgmansskrivstovan hevur tikið hetta óvanliga stig, men hann var ikki at hitta.
Hóast eingin grundgeving var fyri uppsøgnini, so skyldast hon uttan iva ta skriving, sum hevur verið í Sosialinum seinastu vikurnar um óskilið í partafeløgunum hjá løgmanni, sum hevur ført til, at tað almenna og onnur hava mist nógvar pengar upp á hesi feløg. Eitt nú hevur BankNordik mist 13 milliónir krónur upp á høvuðsfelagið hjá løgmanni, P/F KRK-Holding.
Hvussu stórt tapið er tilsamans er tað eingin sum veit, uttan Kaj Leo Johannesen sjálvur og felagar hansara, tí í búnum eftir feløgini vóru als eingi virði – ikki so frægt, at tað bar til finna út av, hvussu nógvar ógoldnar rokningar lógu eftir. Tískil vóru feløgini strikað sambært grein 143 í konkurslógini um »selskab uden midler«. Tað merkir, at eingin kravánari fær eitt klovið oyra.
Orsøkin til alt hetta rumblið var eitt eitt lesarabræv á Vágaportalinum, at Jørgen Niclasen og Kaj Leo Johannesen vóru lagdir undir at hava givið tí almenna tap gjøgnum partafeløg.
Løgmaður hevur avsannað hetta fleiri ferðir, bæði á Vágaportalinum, í Sosialinum og á Rás2.
Tað er hetta, sum Sosialurin hevur víst á fleiri ferðir, at løgmaður hevur sagt ósatt – og tað er ein trupulleiki.
Dagur og Viku viðgjørdi fríggjakvøldið sama evnið, og har staðfesti løgfrøðingurin Kristina Samuelsen tað, sum Sosialurin fleiri ferðir hevur staðfest, at løgmaður hevði fulla ábyrgd av hesum feløgum, har hann var nevndarformaður.
Spurningurin er so, um løgmaður eisini strikar kringvarpsgjaldið – ella hvussu hann kann hevna seg inn á sjónvarpið...
