VÍF dró longra stráið móti arvafíggindanum Kyndli í dysti, sum hevði ein sera spennandi enda. Við ósigrinum misti Kyndil møguleikan at vinna silvurmerkini, sum teir fóru eftir, men havnamenn kunnu ugga seg við, at teir fáa bronsumerkini undir øllum umstøðum
Hondbóltur
Stefan í Skorini
Hóast meistaraheitið fyri langari tíð síðani er farið til Vestmanna, so varð lagt upp til ein spennandi dyst millum Kyndil og VÍF. Hetta er klassikarin í føroyskum hondbólti, og fólk fingu eisini spenning at síggja.
Kyndlamenn vóru uppsettir at vinna dystin og løgdu nógv fyri í teirra stremban eftir at gerast næstbestir í føroysku landskappingini, men tað eydnaðist ikki á hesum sinni.
Ein av fortreytunum fyri at vinna á VÍF er, at Ingi Olsen verður hildin í føstum teymum. Hesa uppgávuna fekk Høgni Klein, sum mansvardi Inga Olsen næstan allan dystin. Ingi svaraði aftur við at reika runt, og hann fór onkuntíð inn á strikuna fyri at sleppa undan tí tøttu eftiransingini.
Ingi Olsen er ein sera vandamikil leikari, og hann vísti sítt virði, tí hvørja ferð hann slapp leysur, so var vandi á ferð. Hann gjørdi eisini tað seinasta og avgerandi málið, tá hann við langskoti legði bóltin framvið Peturi Magnusson í Kyndlamálinum.
Fylgdust
Liðini bæði fylgdust í málskjótingini í fyrra hálvleiki. At byrja við var Kyndil við yvirlutan, men sum hálvleikurin leið, dró VÍF hinvegin frá vertunum. Tá komið var til hálvleiks, vóru tvey mál á muni, og tað tóktist sum gestirnir vóru eina tonn betri og neyvari í sínum álopsspæli. Tó vóru ongantíð fleiri enn trý mál á muni fyri steðgin.
Við átta málum í part vóru tað brøðurnir báðir Áki og Ingi, sum gjørdu enda á Kyndli. Saman við Sámali Joensen høvdu teir stillað kanónirnar rætt, og tá teir sluppu til skot, so endaði bólturin oftast í netinum.
Kyndil skifti nógv út, tá skift varð frá verju til álop, og Bjarni Wardum spældi fyri tað mesta í álopinum. Bjarni var vandamiklasta hóttanin útifrá, sum Kyndil hevði, og hann varð eisini mansvardur til tíðir av Johnny Joensen.
VÍF dregur frá
Tá VÍF liðið vísti seg aftur á vøllinum vóru teir naskari og meira ágangandi enn áður. Kyndlamenn vóru heldur meira afturhaldandi og ikki so svangir hóast tað vóru teir, ið skuldu vinna dystin.
Tað einu løtuna steðgaði Kyndil upp, og VÍF tók yvir. Serliga var tað Áki Olsen, sum vísti sínar dygdir hesa løtuna. Hann skeyt fýra mál í fimm minuttir, og tá hildu tey flestu, at VÍF fór at koyra sigurin heim uttan trupulleikar. VÍF legði nú sjógv ímillum seg og Kyndil, og ta einu løtuna vóru fimm mál á muni.
Men Kyndil legði ikki árarnar inn. Heimaliðið helt fram við at stríðast, og serliga Bjarni Wardum gjørdi fleiri mál, tá Kyndil royndi at fanga føroyameistararnar aftur.
Móti endanum eydnaðist tað Kyndli endiliga at javna, men hóast Kyndil hevði mentala yvirtakið, so dró VÍF longra stráið. Tað vóru teir báðir stórskjúttarnir Sámal Joensen og Ingi Olsen, sum skutu tey seinastu málini, sum tryggjaði VÍF enn ein sigur.
Kyndil hevði ein møguleika at javna í seinasta álopinum, men skotið fór á høvdið á málverjanum Eli Müller, sum stóð ein góðan dyst.
Dysturin endaði við eini margháttligari støðu. Eli skal tveita bóltin út í spælið og bara tíggju sekund eru eftir. Hann tveitir til Inga Olsen, sum trýstir bóltin aftur til Eli. Kyndamenn vilja hava brotsspark, men dómarin letur ikki við seg koma, og VÍF vinnur.
Dysturin í tølum
Málskjúttar:
Kyndil: Bjarni Wardum 8, Høgni Klein 5, Uni Wardum 4, Hanus Jensen 3, Jónleif Sólsker 2, Janus Einar Sørensen 2, Heini Bendtsen, Regin Petersen 1
VÍF: Ingi Olsen 8, Áki Olsen 8, Sámal Joensen 5, Johnny Joensen 4, John Zachariasen 2, Petur Frank Joensen 1
Brotskøst: Kyndil 2, VÍF 2
Útvísingar: Kyndil 4, VÍF 3
Dómarar: Hjalmar Petersen og Kristian Johannesen
