Okkaradeildin: Kyndil - KÍF 26-24 (14-9)
KÍF kundi seta seg á ovastu rók á Okkaradeildini, um tað eydnaðist at vinna á Kyndli í Høllini á Hálsi í dag.
Kollfirðingar mundu eisini hava favorittleiklutin, tí Kyndil hevur fingið vána byrjan á kappingarárið. Eftir ósigrar í fyrstu trimum umførunum, skifti Kyndil venjara, og setti Høgna Klein. Fyrrverandi Kyndilsprofilurin fekk góða byrjan við stórsigri á Team Klaksvík, men spurningurin var um teir grønu kundu hótta KÍF.
Og tað kundi Kyndil.
Kollfirðingar, ið ikki hevði Hans Eli Sigurbjørnsson við, vóru aftanfyri 3-0 eftir lítlari løtu, og tað gjørdist enn verri sum fyrri hálvleikur leið.
Stutt fyri hálvleik var støðan 14-7 til Kyndil, áðrenn KÍF minkaði niður í hálvleiksstøðuna 14-9.
Í seinna hálvleiki vendi í holum. KÍF hevði allatíðina hug at minka um munin, og tá ið støðan gjørdist 18-17 eftir einum 12 minuttum av seinna hálvleiki, mundu tey grønu kenna fjáltur.
Men Kyndil helt fast. Seinastu tíggju minuttirnar øktist munurin aftur upp í trý mál, áðrenn KÍF aftur fór at hótta við at stjala sigurin. Tá ið Teitur Joensen minkaði til 24-23 við einum tveimum minuttum eftir vóru kollfirðingar vónrikir, men Tummas Pauli Hanusarson og Tróndur Wardum sløktu hesa vón og avgjørdu dystin, ið endaði við úrslitinum 26-24 til Kyndils.
Tummas Pauli Hanusarson og Anders Risdal skutu ávikavist sjey og seks mál fyri Kyndil.
Tað sama gjørdu Nicklas Selvig og Rúni Joensen fyri KÍF.
Les eisini (trýst)
