Seinni dysturin, sum er spældur í Hvonndeildini í gjár, var í Vági, har VB tók ímóti Kyndli. Dagsins fyrri dystur varð spældur á Skála ímillum StÍF og Stjørnuna, sum deildust um stigini.
Les eisini: Botndysturin endaði við javnleiki
Undan dystinum var Kyndil við 18 stigum á deildum fremsta plássi við Neistanum, meðan VB var á triðja plássi við 12 stigum. Tessvegna hevði tað altstóran týdning fyri VB at fáa úrtøku úr dystinum, um vágskvinnur skuldu gera sær veruligar vónir um at bjóða av í stríðnum um finaluplássini í deildini.
Kyndilskvinnur kunnu tó fegnast um, at tær kunnu fara í jólafrí sum einsamalt oddalið, tí dysturin endaði 30-26 til Kyndil eftir hálvleiksstøðuna 18-15, somuleiðis til útiliðið. Leiðslan hjá Kyndli kom ongantíð veruliga í vanda í seinna hálvleiki.
Hóast oddastøðuna hjá Kyndli, sum nú hevur 20 stig, skal havast í huga, at grøna høvuðsstaðarfelagið hevur spælt ein dyst fleiri enn Neistin.
Støðan í Hvonndeildini eftir seinastu dystirnar í hesum árinum sæst niðanfyri. Klombran vísir á, hvussu nógvar dystir liðini hava spælt.
1. Kyndil 20 stig (12)
2. Neistin 18 stig (11)
3. VB 12 stig (11)
4. VÍF 8 stig (10)
5. StÍF 4 stig (11)
6. Stjørnan 4 stig (11)
Málskjúttarnir í Vági vóru hesir:
VB-Kyndil 26-30 (15-18)
VB: Bára K. Mortensen 7, Danijela Mistric 5, Maria H. Weyhe 4, Gurið K. Augustinussen 4, Rúna M. Jacobsen 3, Helga Kjærbo 2 og Barbara K. Hjelm 1.
Kyndil: Súna K. Hansen 7, Anna Brimnes 7, Bjarta O. Johansen 6, Turið Arge 6, Bára K. Hansen 2, Ásleyg Súnadóttir 1 og Guðrið G. Eystberg 1.
