Helena Dam á Neystabø, Katrin Dahl Jakobsen og Nita Næs úr Javnaðarflokkinum. Annita á Fríðriksmørk, Bjørt Samuelsen og Bergtóra Høgnadóttir úr Tjóðveldi. Og Annika Olsen úr Fólkaflokkinum.
Hesar sjey kvinnurnar fara sambært nýggju veljarakanningini at vera partur av nýggja løgtinginum eftir 19. januar. Størsti flokkurin við átta sessum, Sambandsflokkurin, fær sambært kanningini onga kvinnu ting, og tað fáa teir báðir smáu, Miðflokkurin og Sjálvstýrisflokkurin, heldur ikki.
Í dag sita tríggjar av 32 kvinnum í tinginum, Annita á Fríðriksmørk, Heidi Petersen og Lisbeth L. Petersen, og tað er níggju prosent av samlaðu umboðanini. Í nýggju veljarakanningi fer kvinnuumboðanin upp í 21,2 prosent.
Tær tryggu
Annita á Fríðriksmørk, Helena Dam á Neystabø, Annika Olsen og Bjørt Samuelsen tykjast sambært nýggju veljarakanningini at hava beina kós ímóti tinginum. Bæði Annita og Helena liggja einsamallar á øðrum plássi í ávikavist Tjóðveldi og Javnaðarflokkinum eftir formenninar Høgna Hoydal og Jóannes Eidesgaard. Annita fær 13 prosent av atkvøðunum í Tjóðveldi, og Helena fær 8,7 prosent av atkvøðunum í Javnaðarflokkinum. Annika Olsen í Fólkaflokkinum liggur á einum býttum øðrum plássi saman við formanninum Jørgen Niclasen. Bæði fáa tey 8,3 prosent av fólkafloksatkvøðunum aftanfyri toppskúttan Jacob Vestergaard.
Og til seinast tykist nýggja valevni Bjørt Samuelsen at standa sterk. Hon liggur á triðja plássi í Tjóðveldi við 6,6 prosentum av atkvøðum floksins.
Tær ótryggu
Katrin Dahl Jakobsen, Nita Næs og Bergtóra Høgnadóttir eru sambært hesi veljarakanningini millum ytstu mandatini í ávikavist Javnaðarflokkinum og Tjóðveldi. Katrin og Nita eru ávikavist á fimta og sætta plássi í Javnaðarflokkinum við 3,6 og 3,2 prosentum av floksatkvøðunum, og Bergtóra Høgnadóttir er á fimta plássi í Tjóðveldi við 3,2 prosent av atkvøðunum.
Hesi úrslitini skulu sjálvsagt takast við fyrivarni, og tað er vert at leggja sær í geyma, at flestu veljararnir svara “veit ikki”, tá teir verða spurdir, hvat valevni fær teirra kross. Tað merkir, at nógv kann broytast tann 19. januar.
Men sambært hesi kanningini bendir kortini á, at nógva kjakið um og kampanjan fyri øktari kvinnuumboðan í føroyskum politikki fer at geva úrslit til komandi løgtingsval.
