Leiðarin á Kunningarstovuni í Vágum hevur sagt seg úr starvi. Hann fer úr starvinum um hálvan februar.
Terji Nielsen, hevur í umleið eitt ár verið í starvi sum leiðari á Kunningarstovuni hjá felagnum Vágum. Umframt leiðarin er hálvtannað fólk í starvi á Kunningarstovuni og Kunningardiskinum á flogvøllinum.
Verandi kunningarleiðarin fer um hálvan februar í starv sum blaðmaður á Sosialinum.
Terji Nielsen hevur ikki so nógvar viðmerkingar til skiftið, aðrar enn, at hann fyrr hevur verið blaðmaður á Sosialinum, og honum hevur av og á longst aftur eftir slíkum starvi, sigur hann.
Hann hevur seinnu árini búð í Dnanmark, og fór beinleiðis í starvið sum kunningarleiðari í Vágum, tá hann í fjør flutti heimaftur.
Terji Nielsen býr í Havn, og hann dylur heldur ikki fyri, at eitt starv nærri bústaðnum eisini hevur okkurt við skifti at gera.
Niels Olgar Joensen, formaður í Felagnum Vágar, ið rekur kunningarstovuna, váttar, at kuningarleiðarin er farin úr starvi. Hann sigur, at enn er eingin endalig avgerð tikin um, hvussu nú verður við starvinum, men at tosað hevur verið um eitthvørt í hesum sambandi.
Niels Olgar Joensen sigur, at ein fundur verður nakað skjótt, og har verður helst tikin avgerð um, hvussu nú verður gjørt.
Niels Olgar Joensen sigur, at nakað væl av tíð og orku er brúkt at fáa kunningardiskin á flogvøllinum at virka, nú Felagið Vágar hevur yvirtikið hann. Og tað gongur bara heilt væl við tí, sigur formaðurin í Felagnum Vágum.
Fráfarandi kunningarleiðarin sigur, at Kunningarstovan í Vágum í løtuni arbeiðir við at skipa fyri einum oyggjarfundi, har evnið verður tann nógv umrødda kommunusamanleggingin. Avgjørt er tó ikki enn, nær hesin fundurin verður, sigur hann.
