Í Klaksvík leggja teir í kvøld síðstu fyrireikingarnar at spæla í Europa.
Snimma í morgin fer ferðalagið úr Klaksvík og vestur í Vágar. Flogfarið við KÍ hópinum lættir úr Vágum klokkan 9. KÍ fer við leiguflogfarið til Riga í Lettlandi.
Dysturin í Conference League ímóti RFS verður í Riga hósdagin klokkan 17.00.
Meðan fokus er á stóru avbjóðingini í Lettlandi og síðani á heimadystinum í Klaksvík eina viku seinni, so verður eisini hugsað um framtíðina.
Í kvøld boðar KÍ frá á nýggju heimasíðuni, ki.fo, at sáttmáli er undirskrivaður við Claes Philip Kronberg, sum ber við sær, at 34 ára gamli danski miðvallarin eisini í 2022 fer at spæla við KÍ.
Higartil í ár hevur Claes Philip Kronberg verið við í 13 dystum, hann hevur skorað trý mál og er skrásettur fyri seks upplegg. Avrikini hava verið so mikið sannførandi fleiri tær seinastu ferðirnar, at hann hevur vunnið sær fast pláss á liðnum.
