Krígssavnið í Vágum hevði aðalfund hóskvøldið 27. februar. Hesaferð stóðu sitandi formaður, Karl Jóhan Nielsen og Klæmint Weihe, nevndarlimur, fyri vali. Teir tóku báðir við afturvali, og eingin stillaði upp ímóti teimum. Eisini eykalimirnir, Poul Arni Jacobsen og Petur Elias Nielsen, vórðu afturvaldir uttan mótvalevni.
Eftir aðalfundin skipaði nevndin seg, og heldur hon fram púra óbroytt. Karl Jóhan Nielsen er formaður, Dánjal Poulsen, næstformaður, Marna Jacobsen, skrivari, Fróði Poulsen, kassameistari og Klæmint Weihe er nevndarlimur.
Í síni frágreiðing fyri 2019 kundi formaðurin greiða frá einum hendingaríkum ári.
Arbeiðið við at seta SOR-bygningin við flogvøllin í stand er komið undir land, og fyrst í mai letur Krígssavnið alment upp har.
Millum aðrar spennandi hendingar í 2019 kunnu nevnast búnin hjá Prest-Heina og flaggið hjá sluppini, Eysturoynni. Báðir hesir lutirnir verða nú fast sýndir fram á Krígssavninum.
Prest-Heini var, sum navnið ber boð um, sonur Vága-prestin. Prest-Heini var smádrongur, tá bretskir hermenn kom í Vágar undir krígnum, og herovastin búði hjá presti ta fyrstu tíðina.
- Smádrongurin var bergtikin av hermonnunum og ikki minst teirra búnum, so herovastin syrgdi fyri, at ein búni bleiv gjørdur til hansara. Prest-Heini slapp so ofta at ganga fremst í fylginum, tá hermenninir marsjeraðu, og av hesum gjørdist hann ein bygdamynd í tátíðini.
Í tíðindaskrivi í kvøld verður hildið fyri, at flaggið av Eysturoynni má sigast at vera søguligt á sama stigi sum fyrsta Merkið, ið hongur í Famjins Kirkju. Tí, tá Eysturoyggin vant sítt føroyska flagg niðri við Orknoyggjarnar á veg til Aberdeen um miðjan apríl 1940, var tað fyrstu ferð, at flaggað varð við Merkinum alment.
- Skipið varð nevniliga steðgað av einum bretskum herskipi, sum gjørdi skiparanum greitt, at Eysturoyggin kundi vænta at verða søkt, um hon flaggaði við Dannebrog, tí Danmark var hersett av týskarunum.
Lagt verður aftrat, at skiparin hevði føroyska flaggið í kahúttini, og so var tað vundið á stong í staðin. Nakrar dagar seinni bleiv flaggið alment viðurkent av bretsku myndugleikunum.
Á aðalfundinum hjá Krígssavninum vórðu dagførdar viðtøkur fyri Krígssavnið einmælt samtyktar. Talan er tó í høvuðsheitum um, at tær gomlu ásetingarnar partvíst eru umorðaðar og samanskrivaðar og tískil gjørdar greiðari.
- Fróði Poulsen, kassameistari, kundi í síni roknskaparfrágreiðing staðfesta, at raksturin av Krígssavninum samanlagt verður bíligari, nú flutt verður í egin høli. Úrslitið í fjør var slakar 324.000 krónur ímóti stívliga 292.000 í 2018.
At enda verður sagt, at nógv er gjørt við SOR-bygningin í undanfarna ári, og hetta sæst eisini aftur í eginognini, sum er vaksin úr 1,4 miljónum krónum í 2018 upp í 1,7 miljónir krónur nú.
