- Sangirnir ljóða sum demo-sangir, mest sum, sigur Rúni Korsgaard, sum undir pseudonyminum The Strangers hevur givið út sína fyrstu fløgu.
Hann plagar at vita nógv um tónleikin hjá øðrum. Antin sum tónleikaserfrøðingurin í útvarpssendingini Korsie & 60'ini, ella sum verturin í Kallkyn, sum einaferð var at hoyra í útvarpinum.
Men nú roynir hann seg alment sum tónleikari.
Undir pseudonyminum The Strangers hevur Rúni Korsgaard vanliga nevndur Korsie givið út soloútgávu við heili 22 løgum.
- Eg síggi alla fløguna sum eina stóra grýtu, har eg havi smekkað nakað av tí, mær dámar punk, rock, lo-fi, experimenterandi tónleik, '60ára-tónleik, osv. í, og blandað tað væl saman til eina merkiliga samankóking.
Hóast tilfarið er rúgvumikið, so tók ikki drúgva tíð at taka tónleikin upp.
- So at siga allir sangirnir eru first-take-upptøkur. Annars eru onkrir eisini diktafon- og heima-frá-kamarinum-upptøkur, sigur Korsie.
Hvørki penga- ella tíðarneyð er orsøkin til, at sangirnir eru tiknir upp so skjótt.
- Tað skal ljóða soleiðis. Lo-fi, fyrst og fremst. Tað er andin í fløguni. Nakað, Sigmund og eg báðir vóru samdir um frá byrjan. Sangirnir ljóða sum demo-sangir, mest sum, sigur ungi havnarmaðurin.
Sigmund Zachariassen, sum annars júst hevur givið út sína debutfløgu, hevur upptikið fløguna og hjálpt til vegs enda.
Á ávísum løgum hevur Korsie eisini fingið hjálp frá Sigmundi á bassi og hinum tónleikaranum í The Mirror Men, nevniliga trummuleikaranum Akseli Tórgarð.
