- Komið trygg til Íslands. Ja, vit skulu júst gera ætlaðar vitjanir í Íslandi, nú støðan er, sum hon er.
Tað sigur aðalskrivarin í Útnorðurráðnum, Inga-Dora Markussen við sermitsiaq.ag. Hon vísir á tað kjak, sum seinastu dagarnar hevur verið í sosialu miðlunum í kjalarvørrinum av hendingini í Íslandi, har tveir grønlendskir fiskimenn eru mistonktir fyri at hava dripið eina 20 ára gamla, íslendska gentu.
Í sosialu miðlunum herjar eitt kensluborið kjak um páhaldið, at grønlendingar eftir nevndu hending verða útsettir fyri sjikanu í Íslandi.
- Kjakstøðið í sosialu miðlunum hevur nátt botnin, staðfestir Inga-Dora Markussen, sum mælir til, at fokus verður sett á tey faktuellu viðurskiftini - og ikki á tey kenslubornu.
Hon avvísir avgjørd, at hald er í páhaldinum um, at grønlendingar í løtuni eru illa sæddir í Íslandi.
- Íslendingar eru ógvuliga grønlendinga-vinarligir. Sjálvandi eru tað eisini her á oynni fólk, sum rópa hart. Men, sum heild er talan ikki um ein trupulleika, staðfestir aðalskrivarin.
Hon mælir til, at grønlendingar júst í teirri støðu, sum er í løtuni, tora at standa fram og vísa andlit, soleiðis at samstarvið millum londini verður uppihildið.
- Her í Íslandi er fólkið ógvuliga bevíst um, hvussu man eigur at bera seg at. Íslendingar minnast sjálvir, hvussu teir upplivdu viðferðina, teir fingu frá Danmark, tá fíggjarkreppa rakti Ísland, sigur Inga-Dora Markussen.
