Klaksvíkar Billardfelag hevur klárað seg væl – serstakliga tvey tey seinastu árini, og varð tí skipað fyri móttøku í stásiligu felagshølunum í hóskvøldið, har Signhild V. Johannesen, forkvinna í Mentanarnevndini helt røðu, fyri errnu vinnarunum hjá Klaksvíkar Billiardfelag og handaði teimum blómur og ein kekk.
Felagið hevur vunnið allar deildirnar og kunnu tí kalla seg FM vinnarar í 1. deild, vinnarar av 2. deild og vinnarar av 3. deild. Hetta er ikki hent áður í søgu felagsins, og siga teir seg vera sera stoltar av hesum flotta avriki.
Klaksvíkar Billardfelag, sum er eitt ítróttarfelag og hevur limaskap í Í.S.F; telur umleið 30 limir, har 10 teirra eru virkandi billardspælarar.
Eitt av endmálunum hjá felagnum er, at eyggja og menna ungar leikarar innan billardspælið.
Í Haldur Holm Cup, sum er ein serlig kapping, hava leikararnir vunnið 12 heiti og er hetta eisini met í Haldur Holm Cup kappingini.
Klaksvíkar Billardfelag fegnast um, at tað nú aftur gongur framá við teirra virksemið og eru eisini serliga fegnir um góðu høliskarmarnar at virka undir, sum eru við til at bera felagið fram á leið - saman við góðu spælarunum, sjálvandi.
Røða, Signhild V. Johannesen, forkvinna í Mentanarnevndini helt fyri Klaksvíkar Billiardfelag á samkomu í felagshølum teirra 28. mai 2015.
Ein av undangongumonnunum í billiardspæli, Haldor Holm, var ikki hvør sum helst. Sum ungur maður var hann limur í DSU, Dansk Sosialistisk Ung. Har vóru aðrir mætir menn sum Viggo Kampmannn; teir komu at kennast og knýttu vinarbond.
Haldor flytir til Klaksvíkar, og seinni gerst Viggo danskur forsætismálaráðharri. Forsætismálaráðharrin kemur á Føroyavitjan og ynskir at heilsa upp á Haldor, men tíðarætlanin helt av einhvørjari orsøk ikki, og teir sóust ikki á teirri vitjanini.
Kampmannn var so forharmaður, at næstu ferð danski forsætismálaráðharrin kom á vitjan, hesaferð var tað Jens Otto Krag, heitti Kampmannn á Krag um at fáa Haldor Holm við á skránna. Tað eydnaðist, og kom forsætismálaráðharrin við fylgi til ábit, í dag kanska kallað brunsj.
Við í fylginum vóru embætisfólk og løgmaður, Hákun Djurhuus. Haldor spyr forsætismálaráðharran: “Må jeg få lov at spørge Dem et spørgsmål?” “Gerne” svaraði forsætismálaráðharrin. “Hvad hed den danske statminister i 1920?” “1920? ... hmmm?” Allir at klóra sær í nakkanum, og fleiri nøvn vórðu nevnd, m.a. Zale, men nei Jens Otto Krag visti ikki. Løgmaður og onnur royndu at hjálpa forsætismálaráðharranum. Aftan á mikið høvuðbrýggj sigur Haldor: “Jeg mente, hvad hed De i 1920?” Hóast Haldor hoyrdi, at teir misskiltu spurningin, læt hann kjakið fara so langt, at tað bleiv pínligt.
Nøkur ár seinni var Haldor í Danmark og hevði fingið avtalu við Jens Otto Krag at koma framvið at heilsa uppá, tá sigur Krag: “Ikki gloymi eg spurningin hjá tær, havi fortalt tað fyri fleiri av mínum vinum, helt tað ikki vera lítið frekt.” Soleiðis kenna nøkur av tykkum kanska Haldor Holm.
Klaksvíkar Billardfelag
Eitt lítið felag við stórum menningarmøguleikum og vilja. Tit hava virkuliga víst í verki, at tit kunnu og hava markerað Klaksvíkar Billiardfelag sum eitt felag við stórari framgongd.
FM- vinnarar í 1. deild, vinnarar í 2. deild og vinnarar í 3. deild.
Eisini hava tit met í at vinna Føroyameistaraheitið fyri lið og einstaklingar og met í at vinna Haldor Holm cup kappingina.
Tit eru teir bestu í landinum.
Smáir men knáir, sigur orðatakið, ikki kann sigast annað um eitt felag við 30 limum, sum kortini megnar at seta seg á heimskortið í Føroyum.
Tað er altíð hugaligt at síggja fólk, sum brenna fyri sakini, og tað gera tit so sanniliga. Tit hava hugnað um og gjørt hesi hølini betri, og trivnaðurin er hareftir. Øll tann orkan og øll tann tíðin, tit brúka í felagnum og í húsinum, er gull verd. Kanska eru hvørki vit ella tit greið yvir, hvat tit gera fyri samfelagið, og hvat tit leggja eftir tykkum. Tit skapa virðing, trivnað og nøgdsemi, nakað sum onnur taka til sín og njóta gott av.
Eg kann ikki annað enn fegnast um, at vit funnu eina nøktandi loysn við hesum hølunum. Eru tit nøgdir, eru vit tað eisini. Nøgdsemi og framgongd hjá felagnum smittar av sær í lokalsamfelagnum og slær ringar í sjógvin.
Eg ynski tykkum hepna hond framyvir. Hjartaliga til lukku og takk fyri, at tit góvu tykkum stundir at líða á.
So fari eg at biða FM-vinnarnar í 1. deild - Hallur og Kristian Suna - vinnarnar í 2. deild - Allan og Petur Joleiv - og vinnarnar í 3. deild - Hans Jacob og Rana - koma higar. Harumframt vil eg eisini hava formannin í felagnum at koma higar.
Hjartaliga til lukku.
Signhild V. Johannesen, forkvinna í Mentanarnevndini
